Johannes 13: 31-35
Christene het nie nodig om in een huis te woon om koinonia uit te leef nie. Koinonia is nie net ’n geselsie oor koffie na ’n erediens nie. Koinonia is die uitleef van Jesus se liefde wat in ons lewens moet verskyn. Net soos Jesus vir sy dissipels vertel het in Johannes 13: 34: Soos Ek julle liefhet, moet julle mekaar ook liefhê.
As medegelowiges kan ons mekaar bedien met ons geestelike gawes. Geestelike gawes is maar een van die sleutels tot ware koinonia. Soos Petrus ook skryf in 1 Petrus 4: 10: As goeie bedienaars van die veelvoudige genade van God moet elkeen, namate hy ’n genadegawe ontvang het, die ander dien. God gee hierdie gawes aan ons, daarom kan ons nie anders nie as om Hom en ander daarmee te dien.
Ons kan meer gasvry wees teenoor mekaar. Bied hulp aan waar nood is. Moenie wag om gevra te word nie. Gaan en gaan doen. Skep geleenthede waar medegelowiges saam kan wees rondom die Woord. Bid saam, leer saam, groei saam. Aanvaar mekaar se tekortkominge, niemand in die lewe is perfek nie. Indien ons verkeerd is, oordeel die verkeerde daad, nie die mens nie. Moedig mekaar altyd aan, sien om na mekaar se behoeftes.
Laat die werk van die Here altyd eerste voorkeur kry. Ons is so geneig om verskonings te maak vir waarom ons nie betrokke raak nie. Stel God en sy werk altyd eerste. Deur dit te doen, bring ons eer aan God en bou ons sy koninkryk uit. Ons word self ook geestelik daardeur verryk. Ons ervaar sy vrede, vreugde, harmonie en eensgesindheid saam met medegelowiges.
Jesus was vir ons die rolmodel vir hoe om te leef, Hy leer dit ook vir sy dissipels en laat dit vir ons na om verder te beoefen. Los die eie-ek en die selfgesentreerdheid, fokus op Jesus. Volg sy voorbeeld en implementeer koinonia in jou lewe. Die vrug daarvan sal jou verbaas. Dit sal vir jou tot seën wees.
Here, leer my om aan myself te sterf, dat ek kan leef tot u eer! Amen.
Ds Anneline Geyer, Kempton Park-Oos
