Psalm 139: 1-6
By die wêreldkampioenskappe in Boedapest in Junie 2022 het die VSA se swemmer Anita Alvarez gesink na die onderkant van die swembad. Andrea Fuentes, haar afrigter, het vir Anita geken. Sy het geweet waartoe Anita in staat is, vir hoe lank sy onder die water kan bly, en dit het te lank geword. Sy het daarom in die water gespring, klere en al, sodat sy Anita uit die water kon haal.
Natuurlik is daar ook mense wat ons so goed ken dat hulle weet vir hoe lank ons onder die metaforiese water kan bly. Somtyds is ons toegegooi onder so baie dinge dat dit te veel raak en ons nie self daaruit kan kom nie. Tog vergeet ons wie die Een is wat ons daaruit kan help. God is die Een wat ons so goed ken. Hy weet wat ons kan hanteer en wanneer iets vir ons te veel raak. Dit beteken nie noodwendig dat ons situasie in ’n oogwink sal verdwyn nie. Die Here ken ons, en daarom het ons mense rondom ons wat vir ons omgee. Hulle ondersteun ons wanneer dit te veel raak, en ons kan weet dat wanneer ons dreig om te verdrink, dit God sal wees wat hulle stuur om ons daaruit te red. Dit is hoe groot sy liefde is.
Dit bring ons ook by die vraag of ons daardie persoon sal wees vir die mense rondom ons. Laat ons die Gees van God in ons harte toe en is ons ontvanklik wanneer Hy ons lei na mense toe? So gereeld probeer ons ons uiterste bes om nie betrokke te raak by ander se swaarkry of moeilikheid nie. Tog sê Jesus dat daar geen groter liefde is nie as dié van iemand wat sy lewe vir sy vriend sal aflê.
Ons sin van selfbehoud oorheers ons soms. Solank ons nie verdrink nie, is alles reg. Hoewel dit goed is om na jouself om te sien, kan ons tog weet dat ons nie die enigste mense is wat somtyds ’n bietjie lank onder die water bly nie. Ander sukkel ook en al wat ons kan doen, is inspring en help. Ons hoef nie saam met hulle te gaan verdrink nie, maar ons kan onsself sterk maak en voorberei sodat ons daartoe in staat kan wees om hulle uit die water te trek.
Ds Yvette Scholtz, Magaliesmoot
