Markus 1: 1-8
Ons kom nou nader aan die einde van die kerkjaar, daarom dink ons weer terug aan dit wat Jesus vir ons gedoen het: Hy het vir my die Blye Boodskap, die Goeie Nuus gebring. Jesus het ons kom leer van God se koninkryk en om ’n nuwe pad saam met Hom te loop. En die wonderlike is: Jesus het nie net die Goeie Nuus gebring nie, Hy was self die Goeie Nuus.
Wat beteken Goeie Nuus vandag as ons omring word deur slegte nuus? Wat is goeie nuus vir ’n sondaar vandag? Ek is vasgevang in die strik van sonde, ek sukkel met ’n versoeking, met slegte gewoontes. Ek wil graag gehoorsaam aan God leef … en Jesus wil my daarmee help! Dis goeie nuus vir ’n sondaar! Wat is goeie nuus vir ’n soeker vandag? Ek is ’n Christen, maar ek voel los van die Here. Dit voel of ek my eie lewe leef en God is op ’n ander plek. Dan vat ek tyd in my vol program en bid weer opreg. Ek bestee goeie tyd saam met die Here en onthou: Die Here klop aan my hart. Dis goeie nuus vir ’n soeker! Wat is goeie nuus vir iemand wat onderdruk en uitgestoot voel? Ek staan alleen in die wêreld, uitgelewer, blootgestel. Niemand wil my help nie, niemand is aan my kant nie. Dan sien ek iemand anders se nood raak en ek help. Skielik verander alles. Ek sien weer dat ek soveel het om voor dankbaar te wees en soveel wat ek kan bydra. Ek het nuwe moed. Dis goeie nuus, want ek onthou daar is mense wat vir my omgee en daar is die Here wat oor my waak.
Jesus het vir ons die Blye Boodskap van verlossing en vryspraak gebring. Dis goeie nuus vir sondaars, soekers en verwerptes. Die boodskap kan nie stop by die gedeelte wat ons gelees het nie, ons moet nou ook boodskappers word wat Jesus se Blye Nuus met die wêreld deel.
Ds Pieter Rossouw, Mafeking/Zeerust
