2 Korintiërs 4: 7-12
Ons is Christus se dissipels. Christus se dissipels het die voorreg en verantwoordelikheid om Christus se evangelie te verkondig. Verkondiging is ’n belangrike element van ons Christelike geloof.
Paulus wil vir die gemeente in Korinte aandui dat hy die gesag het om die evangelie te verkondig. Die gelowiges in die gemeente het ook die gesag om God in die wêreld sigbaar te maak. Op hierdie wyse leef ons volgens God se wil.
Paulus gebruik die mooi beeld dat ons kleipotte is wat maklik breek. Ons is kleipotte wat deur God se hande uniek gevorm is om Hom in die wêreld te verteenwoordig. Die feit dat ons maklik kan breek, dui op ons menslike swakheid. In ons swakheid is dit maklik om die pad byster te raak, maar die enigste wyse hoe ons nie gaan breek nie, is deur God se krag, omdat Christus die skat is wat die kleipot bevat – Christus leef in ons hart. God se krag en bewaring is wat dit vir gelowiges moontlik maak om God se werk in die wêreld te verrig. Sonder God se bystand kan ons nie sy evangelie verkondig nie.
Paulus doen alles in sy vermoë om te leef vir die evangelie. Hy kry swaar vir die evangelie, maar God staan Hom elke oomblik by. Gelowiges kan hoop hê in hul lyding, want Christus is saam met ons in ons swaarkry, omdat Hy self lyding ervaar het. In vandag se wêreld kan dit moeilik wees om te doen wat reg is, maar God staan ons in goeie en slegte tye by. Hy is altyd daar om bystand en krag te bied vir sy skepsels.
Ons moet ons vertroue in God plaas en oortuig wees daarvan dat God altyd saam met ons in ons omstandighede is. Wanneer ons die evangelie uitleef en na ander bring, is God daar om bystand en krag te bied. God is teenwoordig in sy skepping deur ons by te staan waar ons sy werk in die wêreld verrig. Dit is die grootste skat wat ons kan besit.
Ds Hanri Reichel, Van Warmelo
