Psalm 124
Psalm 124 herinner aan Psalm 23, waar die spreker aandui dat God sy hulp is, en sonder God sal die spreker kwesbaar wees. Psalm 124 besing die Here se lof vir sy goedheid teenoor die volk. Nadat Israel uit ballingskap teruggebring is, het God hulle steeds bygestaan. Israel dink terug aan God se goedheid, en die volk besef hulle sou in groter gevaar gewees het sonder God se beskerming en hulp. God red sy volk op ’n konstante basis uit gevaar. Indien God nie vir Israel red nie, sal hulle deur hul vyande vernietig word.
Die frase as … dan kom sterk in Psalm 124 voor. Hierdie frase beklemtoon die volgende gedagte: As God ons nie gehelp het nie, dan sou die volgende gebeur het… Dit dui daarop dat God se hulp uiteindelik die volk daarvan weerhou het om in die vyand se mag te val. Indien God nie help nie, sal die gelowige se lewe in duisternis verval. God is uiteindelik die Een wat red. Sonder Hom kan gelowiges nie in vreugde voortgaan nie. Hy is ons hulp en redding.
Die Psalm getuig van God se bystand deur die eeue. In elke stadium van die geskiedenis is die Here betrokke by sy skepping en skepsels. Soos Israel se toekoms, is ons toekoms en eie lewe nie in ons eie hande nie, maar in God se hande. Hy is die Een wat ’n toekoms moontlik maak. Sonder Hom verkeer gelowiges in totale kwesbaarheid.
Ons moet die Here prys vir sy goedheid en genade, want daarsonder sal ons verpletter word in die lewe. God se goedheid en guns kom elke dag opnuut voor in ons lewe en ons kan net in afhanklikheid voor Hom staan en dankie sê. Ons moet op ’n nuwe wyse diep nadink oor God se betrokkenheid in ons lewe. Hy laat ons nooit alleen nie. God vergesel ons in al ons omstandighede en Hy bied vir ons die uitkoms. Kom ons loof God, soos die spreker in Psalm 124, vir sy konstante liefde en bewaring wat ons nooit verlaat nie.
Ds Hanri Reichel, Van Warmelo
