1 Korintiërs 3: 10-23 (AFR2020)
Elkeen moet egter let op hoe hy daarop bou (vers 10c).
’n Bouer, gevorderd in jare, wat eens vir ’n groot maatskappy gewerk het, het besluit om af te tree. Sy werkgewer was baie teleurgesteld omdat hierdie bouer nog altyd gehaltewerk gelewer het. Hy vra hom toe of hy nie, as ’n laaste en persoonlike guns, net nog een huis sal bou nie – ’n huis vir ’n baie spesiale persoon. Hoewel teësinnig, het hy tog ingestem, maar gou-gou kon ’n mens agterkom dat sy hart nie meer in sy werk was nie. Hy wou so gou moontlik klaarkry. Die afrondingswerk was slordig … selfs die boumateriaal was van swak gehalte. Dit was werklik teleurstellend om te sien op welke manier die ou man sy baie begaafde en toegewyde loopbaan afgesluit het – so halfhartig, so belangeloos, so slordig…
Met die projek afgehandel, het sy werkgewer hom nadergeroep om die huis te inspekteer. ’n Mens kon sien dat die werkgewer teleurgesteld was. Dit was nie hoe hy die bouer geken het nie. Hy hou toe die voordeursleutel van die huis na die ou man toe uit: Dit is my afskeidsgeskenk aan jou vir jare se gehaltewerk! Net jammer hierdie huis getuig nie daarvan nie!?
’n Mens kon die ou man met ’n veertjie omtik – as hy maar net geweet het dat hy eintlik besig was om sy eie huis te bou! Hy het sy kop in skaamte laat sak – almal het sy skande gesien!
In hierdie gedeelte van sy brief aan die Korintiërs fokus Paulus op gelowiges as tempel van God. Hy praat van ’n fondament waarop gebou moet word. Uiteraard is die fondament Jesus Christus en voornemende bouers aan hierdie geestelike tempel moet mooi let hoe hulle daarop bou. Op ’n manier kom ons “werkgewer”, Jesus Christus, by ons aanklop om vir sy “maatskappy” nog bouwerk te verrig. Die gesindheid waarmee ons hierdie opdrag aanvaar en die bouwerk uitvoer, is van allergrootste belang en vra ons allerbeste.
Dr André Ungerer, Hervormde Teologiese Kollege
