Johannes 1: 1-14
Die Woord was by God en die Woord was self God, en Johannes getuig dat alles wat bestaan deur Hom en tot Hom tot stand gekom het. Ons bestaan en tyd en lewe het ook nie sonder Jesus tot stand gekom nie. Die geskiedenis van God se skepping, die geskiedenis van God se besigwees met hierdie wêreld, soos dit gestalte gevind het in die geskiedenis van die kerk en gemeentes, is ook die voorafpad wat ons begrond in hierdie oomblik. Deel van daardie geskiedenis sou wees dat Jesus Christus, die Woord van God, vlees sou word. Die lig wat die duisternis in elke sondeverslaafde mens sou wegneem, breek in die wêreld in, en tog sou sy mense Hom nie aanneem nie. So sien ons dat die geskiedenis van kerk en wêreld sou berus op keuses, en God wat te midde van die duisternis en gebroke wêreld steeds met mense bemoeienis maak.
Groot is God se liefde en genade dat aan almal wat Hom aangeneem het, Hy die reg gegee het om kinders van God te word. Uit die dooie letters van God se Woord, stap Jesus as lewende Verlosser en Saligmaker, as Persoon, ons tegemoet. Ons hoor van God se koninkryk, opdragte en lewensreëls, die blye evangelie wat aan ons as Christene lewensin, hoop, troos en ’n toekoms bring.
Ook ons is besig om ’n stuk wordende geskiedenis te leef. Ons leef in huwelik en gesin, as ouers en kinders, as mense in verhoudings met ander. Hoe ek in Jesus se voetspore loop, los ’n stuk geskiedenis in geliefdes en ander mense se lewens. Sal dit ’n geskiedenis wees wat lig bring, of los ek ’n stuk geskiedenis wat verwond en letsels maak, wat later ’n beletsel is om in die krag en vrede van my Verlosser te leef?
Ons is kinders van God, nie van my eie natuur nie, nie deur die drang of besluit van ’n mens nie: Ons is uit God gebore. As ons geskiedenis en lewe lig wil wees, ontmoet Hom wat gekom het daagliks en besef dat alles wat lig bring, deur Hom alleen gegee word. Ons moet dit in dankbaarheid ontvang en gehoorsaam.
Ds Hans Britz, Standerton
