2 Korintiërs 3: 1-18
Paulus sê, die rede waarom daar ’n kerk is, is sodat die heerlikheid van Jesus Christus deur al die gelowiges, die gemeente en die kerk in die wêreld uitgestraal word. Daarvoor gebruik hy die volgende beelde: Die verligting wat in ons werk, moet in die wêreld uitstraal; die geur van die lewe waaraan ons deel gekry het, moet in die wêreld versprei word; die heerlikheid van Christus moet deur die gemeente sigbaar word in die wêreld.
Dit doen die Gees deur die gemeente. Maar hoe? Paulus sê dit werk soos ’n spieël (verse 17-18). Wanneer ’n mens na jou beeld in ’n spieël kyk en jy maak allerhande bewegings, sal jou beeld in die spieël jou bewegings terug reflekteer. Maar hier werk dit andersom. Wanneer ons die Skrifte lees, daarna luister, dit oordink, sien ons in die Skrifte die heerlike beeld van Christus. En terwyl ons dit doen, word óns verander, vernuwe, om al hoe meer soos die beeld van Christus te lyk, te word en te wees. Van heerlikheid tot heerlikheid. Stappie vir stappie. Elke keer weer en weer.
En so neem Christus gestalte aan in die wêreld. In ons. Só versprei Christus se heerlikheid in die wêreld. Deur ons. Só straal Christus se lof uit in die wêreld. Uit ons. En dit alles doen die Here, wat die Gees is en lewend maak. Dit is die eintlike werk van die Heilige Gees, want só word Jesus Christus verheerlik. En so maak die Heilige Gees ons ook lewend deur die waarheid, deur die Woord.
Daarsonder is ons dood. Ons het dit bo alles nodig, want die grootste oorsaak van ons doodsheid is juis ons dwaasheid, ons sonde, ons onsekerheid, ons verwarring en verdwaaldheid. Dis is daarom dat ons sonder ophou tot die Heilige Gees moet roep, die Here wat spreek deur die profete, deur die Woord, om ons so in die waarheid te lei en om ons so lewend te maak dat ons al meer verander na die heerlike beeld van Christus.
Dr Christo van der Merwe, Emeritus
