1 Korintiërs 3: 10 (AFR2020)
Volgens die genade deur God aan my gegee, het ek soos ’n bedrewe bouer ’n fondament gelê…
Enkele jare gelede besluit ons om ons badkamer aan die hoofslaapkamer oor te doen. Dit is vroeg in Desember en daar is nie baie tyd oor voor Kersfees nie. Ons druk deur, want ons is tuis en kan toesig hou. Ons kry toe iemand wat voorheen vir ons ligte messel- en pleisterwerk gedoen het en na ons mening min of meer vir die werk geskik is – ’n kontrakteur sou ons te duur uitwerk.
Die werk vorder redelik, maar gou blyk dit dat ons bouer se eintlike verpligtinge by sy werkgewer lê en dat ons bouwerk hoofsaaklik na-ure en oor naweke geskied. Dit ontaard in ’n stryd om tyd en kwaliteit. Kersfees kom en ons verwag ’n huis vol mense. Die projek word in die doodsnikke afgehandel en ek moet noodgedwonge nog die verfwerk doen. Ek sien die pleisterwerk vertoon sleg – trouens, dit lyk soos ’n mengsel van rekmerke en selluliet en ek dink by myself: Ek gaan dit met ’n paar lae verf mooi toeverf… Nodeloos om te sê, brouwerk kry jy nie toegeverf nie. Die goedkoop projek word ’n duur projek. Om die minste te sê, ’n soort fools-rush-projek.
Paulus kondig homself as ’n bedrewe bouer aan. Hy voeg ook by dat hy hierdie bedrewenheid vanweë God se genade het. Die woorde bedrewe bouer dra in die oorspronklike taal ook die betekenis van “wyse meesterbouer”. Paulus is die wyse meesterbouer wat die fondament van hierdie geestelike gebou gelê het sodat ander daarop kan bou.
Dit is nie bloot toevallig dat hy die konsep van wysheid hier inbring nie. In 1 Korintiërs 3: 1-9 is daar voorbeelde van groepvorming. Daar is sommige partye wat hulle by Paulus skaar en ander aan die kant van Apollos. Gelowiges as tempel van God kan nie op hierdie dwaasheid geskoei word nie. Die bouwerk gaan ’n verleentheid word. Die regte fondament is nodig – ’n fondament wat verseker dat toekomstige bouwerk ’n trotse projek sal wees.
Dr André Ungerer, Hervormde Teologiese Kollege
