Johannes 1: 1-14
Daar is drie groot vrae waarmee ons almal in ons lewens worstel: Sonde? Dood? Hoe cope ek?
Hoe hanteer ’n mens jou eie en ander se sonde wat gedoen word? Sonde wat ek doen of wat ander doen, het skadelike en soms blywende gevolge op my persoon. Gedagtes van vergelding, bitterheid, vreugdeloosheid en vredeloosheid, en die verlies aan ’n veerkragtige lewe en gesonde verhoudings, is die gevolg. Hierdie gevolge sou onder die woord duisternis tuiskom.
Hoe hanteer ek die dood? Die dood van ’n geliefde bring soveel emosie, en trane van rou kom na vore. Na verlies sukkel ek om die lewe te leef. Hoe cope ek, hoe bly ek staande in alles wat persoonlik en in die stukkende wêreld om my gebeur?
God antwoord deur sy Seun te laat mens word. Jesus stap ons duisternis tegemoet, en Hy is die Een wat lig bring. Hy alleen is die antwoord op die vrae. Vir ons sonde sou Hy sterf. Hy lewer die eenmalige, genoegsame, volkome en enigste offer wat ons met God versoen en verwyder ons sonde so ver van ons af as wat die weste van die ooste af is. In Hom wat gekom het, onder ons kom woon het en aan die kruis gesterf het, vind ek vergifnis vir my sonde, die krag en genade om sonde te oorwin. Omdat Hy oorwin het, kan ek met herstellende vergifnis in my lewe leef. Hy oorwin die dood, sy leë graf is die ewige teken dat die dood oorwin is en ons die ewige lewe sal ontvang. Hy het die plek berei, en deur die dood heen kom ons tuis in ons ewige woning, wat nie met mensehande gemaak is nie. Deur Hom alleen cope ek, want uit sy mond staan die belofte vas: Jy sal tot alles in staat wees en meer as oorwinnaar wees deur My wat jou die krag gee.
In alle vrae bly Jesus ons Heer en Meester, ons Here en ons God, die enigste antwoord. Mag ons elke oomblik in elke faset van ons lewe sy lig, wat duisternis laat verdwyn, ervaar.
Ds Hans Britz, Standerton
