1 Korintiërs 12: 1-11
Baie mense wonder: Hoe kan ek die Heilige Gees ervaar? Ons bely die Heilige Gees is Here, wat lewend maak. Wat in die waarheid lei deur die Skrifte. Maar waar en hoe kom die Heilige Gees konkreet en prakties in my lewe? Wat doen die Gees iewers in die wêreld dat ons sy werking kan sien en beleef? Waar bring die Gees lewe in die dood wat ons omring?
Die antwoord wat ons in die Bybel en in die belydenis van Nicea kry, is: Die Heilige Gees vorm ’n kerk. Die Heilige Gees roep, trek, verlos, versoen, skep, beskerm, bewaar, vertroetel, versorg, vertroos en lei ’n kerk. Reeds in die Ou Testament lees ons die belangrikste rol van die Gees van God is om die Godsvolk op allerhande maniere te dien, te lei, te beskerm, en te versorg. Maar in die Ou Testament verneem ons ook reeds die beloftes dat alles eenmaal in heerlike vervulling sal gaan, anders sal word, nuut sal word, wanneer die Gees die Messias opwek; wanneer die Gees in rykdom en in oorvloed uitgestort word op almal, van kinders tot ou mense; en wanneer die Gees van die Nuwe Verbond op elkeen, groot en klein, se hart sal skrywe, sodat hulle waarlik God se volk sal wees. Só werk die Gees.
Hierdeur is die Gees se werking sigbaar in die wêreld. Vir almal wat gedink het die Heilige Gees is in die eerste plek aan hulself persoonlik gegee om te voel en te ervaar en te beleef, sê Paulus dat die Gees in die eerste plek aan die kerk gegee is, aan die liggaam van Christus. Paulus sê dat die bestaan van die gemeente die sigbare gevolg en vrug, die duidelikste bewys van die werk van die lewendmakende Gees van die waarheid is. As iemand saam met die kerk bely dat Jesus die Here is, gebeur dit slegs deur die Gees wat in ons woon. Die kerk is daar vir almal om te sien hoe die Gees werk.
Dr Christo van der Merwe, Emeritus
