Genesis 1: 1-5
Ons is baie bekend met Genesis 1, waar God alles in die heelal geskep het. Hierdie verhaal wil ons nie net vertel hoe dinge ontstaan het nie, maar ook dat God die Een is wat alles geskep het en tot vandag toe ook bly skep. Elke element van die skepping word vir ons in dié verhaal bekendgemaak. Die volgende vraag kom by my op wanneer daar oor die skepping nagedink word: Besef ons werklik wat God geskep het en die krag daarvan?
Die eerste ding wat God skep, is lig. Van die begin van God se skepping af, skep Hy vanaf stap een die belangrikste elemente wat sy skepping sal benodig. Lig is ’n vorm van energie wat deur die menslike oog waargeneem kan word, maar dit is ook soveel meer as dit. Lig bring verligting in donker tye. Lig bring vrede en beskerm in tye wanneer daar vrees is, byvoorbeeld wanneer ’n kind bang is vir die donker. Die lig word aangeskakel, en die kind voel gou weer veilig. Lig bring vir ons vrede en laat ons veilig voel.
Lig is ook ’n metafoor vir God se teenwoordigheid. Lig word met God geassosieer omdat Hy vir ons verligting en leiding bied sodat ons veilig kan voel en rigting kan hê in die lewe. God se lig skyn in ons lewe en bied vir ons die uitkoms. Nie net skep God lig nie, maar Hy is self ook lig. God bied beskerming en vrede soos lig vir ’n kind in donkerte vrede bring.
Elke oggend wanneer ons opstaan en die son sien opkom en lig die aarde verlig, getuig dit van God se teenwoordigheid in ons lewe. Hy is nie afwesig nie, Hy is altyd betrokke by sy skepping. Ons word op ’n daaglikse basis daaraan herinner deur natuurlike elemente soos ’n sonsopkoms. Selfs in die aande wanneer dit donker is, bied die maan vir ons lig. Waar ons ook al in die natuur kyk, is daar lig. Dit beklemtoon dat God nie afwesig is nie. Indien ons ooit daarin twyfel, kan ons bloot by ons venster uitkyk en God se lig in die wêreld sien.
Ds Hanri Reichel, Van Warmelo
