Openbaring 3: 14-21
Met Jesus se opstanding uit die dood het Hy ’n einde kom maak aan die mag en heerskappy van sonde. Hy het die oorwinning behaal oor die sonde wat die lewens van mense verwoes het en steeds poog om dit te verwoes.
Ons lees in Openbaring 3 van die brief aan die gemeente in Laodisea en hoedat Jesus vir die gemeente sê dat Hy voor die deur staan en aan die deur klop. Hierdie gemeente, wat gedink het dat hulle baie ryk is en alles het wat nodig is, moet in die brief verneem dat Jesus voor hul deur staan en klop. Hy wat die dood oorwin het, staan voor hul deur en Hy klop. Ten spyte van wie hulle is en wat in hul lewe gebeur, staan Christus voor hul deur met ’n doel. Hy wil inkom en saam met hulle ’n feesmaal hou. ’n Feesmaal van genade en liefde, van redding en saligheid wat wag om te begin.
Voor die deur staan Christus en aan die ander kant van die deur staan ons. Hy klop en ons moet oopmaak. Hy wil inkom en ’n feesmaal laat begin, en ons moet oopmaak. Gaan ons oopmaak? Hoe lank gaan ons wag voordat ons oopmaak? Gaan Hy nog daar wees as ons oopmaak?
Wie klop aan jou deur en wat gaan gebeur as jy oopmaak? Indien die sonde klop, moet ons nie oopmaak nie. Ons hoef nie die sonde in ons lewe toe te laat nie. Die sonde is oorwin. Die Opgestane Christus klop en Hy bring die lewe, en dit in oorvloed. Wanneer Christus aan jou deur klop, mag jy nie stilstaan nie, jy mag nie huiwer om oop te maak nie. Maak die deur oop. Wees egter ook versigtig vir die vreemde klop wat ook wil inkom en verwoesting wil saai. Hoor die klop van die Opgestane Here. Hoor die klop van lewe en hoop. Hoor die klop van ’n feesmaal.
Dr Martin Jansen van Rensburg, Delmas
