1 Korintiërs 3: 11 (AFR2020)
Want niemand kan ’n ander fondament lê as wat reeds gelê is nie – dit is Jesus Christus.
Die skewe toring van Pisa, die bekende Italiaanse landmerk wat 3,9 m van die middelpunt suid leun, is aan almal bekend. Die bouwerk van die agtverdiepingtoring het in 1173 begin en tot by die tweede verdieping gevorder voordat hulle agtergekom het dat die grond aan die een kant effe begin sak het. Die bouwerk is gestaak en ’n honderd jaar later voortgesit. Gereelde opmeting van die toring het aangedui dat die toring 1,2 mm per jaar geskuif het. In 1987 is die toring as wêrelderfenisgebied verklaar.
In 1989 stort die kloktoring van die katedraal in Pavia, in die streek Lombardye, in duie en die owerhede van Pisa besluit dat ’n span ingenieurs die skewe toring moet stabiliseer. In 2008 is aangekondig dat die toring sodanig gestabiliseer is dat dit vir die eerste keer in die geskiedenis opgehou het om te beweeg. Volgens projeksies sou die toring nog vir 200 jaar stabiel wees. Dit ten spyt, is die 800 jaar oue toring steeds ’n skewe toring.
Kenners van die boubedryf kan jou ure lank besig hou oor hoe belangrik die regte fondasie vir ’n gebou is. In Jesus se gelykenis oor die regte fondasie gaan dit juis oor ’n fondament op die rotsbodem teenoor ’n huis wat net op grond gebou is. Beide bouwerke word aan ’n stormtoets onderwerp, en die huis op die rots bly staan.
Paulus het geen twyfel nie dat Jesus Christus die enigste fondament vir die kerk is en dat niemand ’n ander fondament kan lê nie. Hy wat homself as ’n wyse bouer beskou, is maar te goed bewus dat daar sogenaamde “wyses” is wat God se tempel – wat uit gelowiges bestaan – bedreig (lees verse 19 en 20 in dié verband). Sulke slinkse wyses wil graag aan die Christus-fondament torring. Die regte leer was deur die eeue vir die kerk belangrik. Die regte fondament is ononderhandelbaar – sonder dit sou die kerklike gelowige “gebou” al te veel ’n skewe (Pisa)toring gewees het.
Dr André Ungerer, Hervormde Teologiese Kollege
