Hebreërs 1: 1-4
In die Ou Testament vind ons verskeie tekste waar God deur profete met mense praat. God gebruik mense om sy boodskap en wil aan ander bekend te maak. In die Nuwe Testament word die profeterol vervul deur Christus. Christus word aarde toe gestuur om God se redding vir die mens te bring; om vir ons sondes te sterf en die verhouding tussen ons en God te vernuwe.
Jesus se aardse bediening getuig van God se gesindheid en wil vir sy mense. Na Jesus se kruisdood en opstanding vaar Hy op om aan die regterhand van God die Vader te sit. Dit wil vir ons aandui dat Jesus die hoogste gesag het. Christus besit soveel mag en krag as God die Vader, want Hy is self ook God. Omdat Hy dieselfde gesag as God het, is Jesus ook die regeerder van die skepping. Christus onderhou mense se verhoudings met mekaar asook die mens se verhouding met God.
Deur die Gees lei Jesus ons in die handeling om ons naaste lief te hê, Hy lei ons ook verder in ons verhouding met God sodat ons ons vertroue in Hom kan plaas en God se wil kan uitvoer. Deur Christus se lyding en dood is dit moontlik vir gelowiges om geloof in God uit te oefen en om in ’n nuwe verhouding met God te tree; ’n verhouding waarin ons sondes vergewe word.
In elke verhouding waarin ons met mense is, is Jesus teenwoordig. Hy bied vir ons hulp en bystand in ons verhoudings om ander altyd hoër te plaas as onsself – dit is die voorbeeld waarvan sy lewe getuig. Christus het met sy gesag ’n weg gemaak en ander mense gedien, al was Hy ook God – ander mense was altyd belangriker, en daarom sterf Hy ook vir ons sondes. Hierdie voorbeeld, om ander te dien, moet ons nastreef, en Jesus sal ons in alle aspekte van hierdie taak lei. Jesus se liefde moet uit al ons handelinge voortspruit, die Gees sal ons hierin krag bied.
Ds Hanri Reichel, Van Warmelo
