1 Korintiërs 3: 12 (AFR2020)
Of elkeen nou op die fondament bou met … hout, gras of strooi – elkeen se werk sal duidelik word…
In die Engelse wêreld doen ’n kostelike grappie oor “Randy the painter” die rondte. ’n Gemeente besluit dat hul kerkgebou geverf moet word en win tenders in. Randy tender die laagste en kry die werk. Hy koop verf en uit die staanspoor verdun hy dit op ’n drastiese wyse. Hy vorder fluks met sy verdunde-verdagte-verfwerk en terwyl hy op ’n steier besig is, is daar skielik ’n oorweldigende donderslag. Die hemele open en die reën stort neer. Die verskrikte verwer verloor sy balans en val op die grond, vanwaar hy sien hoe die reën sy verdunde verf van die mure afwas. Synde ietwat van ’n gelowige, besef hy dat dit die oordeel van God is, en hy roep benoud na bo: Oh, God, forgive me; what should I do? Van bo kom toe ’n harde stem: Repaint! Repaint! And thin no more!
Hierdie grappie herinner aan bouwerk wat nie ’n grap is nie – swak boumateriaal waarna Paulus verwys waarmee daar op die Jesus-fondament gebou word. Hy begin op hiperboliese wyse met uitnemende boumateriaal, naamlik goud en silwer; dan kosbare stene; voordat hy met minderwaardige boumateriaal soos hout, gras of strooi eindig.
Soos daar met Jesus se gelykenis oor die fondament op rots of grond ’n stormtoets was, en Randy se verfwerk nie die watertoets kon weerstaan nie, praat Paulus van ’n vuurtoets waaraan die tempel-van-God-bouwerk getoets sal word. Deur vuur sal dit geopenbaar word, en die vuur sal die gehalte van elkeen se werk op die proef stel (vers 13).
1 Korintiërs 3: 10-23 handel oor gelowiges as die tempel van God. Die gemeenskap van gelowiges as gebou berus op die fondament Jesus Christus, en almal wat met watter vorm van “gemeentebou” ook al besig is, sal van hul bouwerk rekenskap moet gee. Die vurige aanslae wat partyskappe (vgl 1 Kor 3: 4-8) meebring, die “verdunning” van die evangelie met dwaalleringe, is die vuurtoets wat brouwerk blootlê.
Dr André Ungerer, Hervormde Teologiese Kollege
