Openbaring 1: 12-20
In Openbaring spreek Jesus tot sy kerk om vir hulle hoop in hul omstandighede te bring. Hy wil hierdie boodskap vir sy kerk bring: Gelowiges hoef nie te vrees nie, want Christus is die Heer oor alle dinge en Hy verlaat sy kerk nooit. Gelowiges se omstandighede sal hulle nie oorheers met wanhoop nie, want Christus bied die uitkoms; Hy beskerm sy mense.
Jesus se teenwoordigheid kan by sy mense gevind word. Christus is nie ver weg van ons nie, Hy is hier saam met ons in ons onderskeie omstandighede. Jesus het vir ons sondes gesterf; om hierdie rede kan ons oortuig wees dat Hy ’n pad saam met sy kerk stap.
Die kerk het ook ’n verantwoordelikheid om God in die wêreld te verteenwoordig. Ons faal soms in hierdie plig weens ons menslike swakheid, maar dit beteken nie dat die kerk sonder God is nie. Deur Christus is God teenwoordig. Christus het die reg en die mag om te regeer, en daarom sal Hy bystand aan gelowiges bied. Jesus help ons om sy lig in die wêreld te laat skyn, te midde van die duisternis wat ons teëkom – niks kan Jesus se vlam blus nie. Jesus is die lig wat hoop bied wanneer tye so donker raak dat ons alle vorme van hoop verloor.
Daarom is die brief van Openbaring kragtig en vol hoop. Dit bied aan gelowiges die sekerheid dat Christus hul hoop is. Net omdat Hy vir ons sondes gesterf het en opgevaar het na die hemel, beteken nie dat Hy afwesig is nie – deur die Gees staan Hy ons by. Die hoop lê daarin dat ons nie alleen gelaat word nie; ons moet net ons oë oopmaak en Christus raaksien. Christus is altyd teenwoordig om hulp te verleen aan almal wat dit nodig kry, ons moet ons vertroue in Hom plaas en met sekerheid weet dat Hy die uitkoms sal bied. God is lief vir sy kerk, daarom sal Hy ons nooit verlaat nie – sy hulp is altyd beskikbaar.
Ds Hanri Reichel, Van Warmelo
