1 Korintiërs 3: 12-15 (AFR2020)
…en die vuur sal die gehalte van elkeen se werk op die proef stel… (vers 13).
Ek het eenkeer saam met vriende by water gekampeer. Rondom die water was daar die gewone gesig van tente en karavane. Die middag was loom en ons het rustig op ons kampstoele gesit en selfs weggedommel. Skielik was daar ’n rumoerige geskreeu aan die oorkant van die water. Tot ons skok het ons gesien hoe grys-swart rook by een van die karavane uitborrel. Mense het vervaard met elke hol ding wat hulle in die hande kon kry water gaan skep en desperaat probeer om die eerste lekkende vlamme te blus. Sekondes later was die vlamme oorweldigend en elkeen het van die hitte weggedeins. In ’n ommesientjie het net die basis en swartgebrande raamwerk van die karavaan oorgebly. Gelukkig was daar geen ongevalle nie – net die onthou van die verterende vuur wat in die magtelose toekykers se geheue ingebrand is.
Hout, gras of strooi is van die boumateriaal wat Paulus lys as verdagte materiaal wanneer die vuurtoets as gehaltetoets aangelê word. Hout word dikwels as klassieke afwerking binne geboue gebruik en vertoon pragtig. Die Egiptenaars van ouds het die Israeliete met strooi gestraf deur dit nie meer in die steenmaakproses te voorsien nie. Hulle moes by die harde werk, skielik al die nodige strooi ook gaan versamel. Feit is – hout, gras en strooi, en ook stene wat met klei en strooi gemaak is, kan selfs nie eens ’n matige vuur weerstaan nie.
’n Vinnige googleloer wys dat goud by ongeveer 1 064 °C smelt en by ongeveer 2 856 °C kook. Silwer se smeltpunt is 961,8 °C en ’n diamant as edelsteen het die hoogste smeltpunt van digby 4 000 °C. Silwer word vandag as minder edel teenoor goud en platinum beskou, maar in die 15de eeu was silwer meer waardevol as goud.
Geen wonder nie dat Paulus goud, silwer en edelstene as gehalteboumateriaal aanprys. God verwag gehaltewerk in sy gemeente as tempel – slegs ons allerbeste vir die Allerhoogste!
Dr André Ungerer, Hervormde Teologiese Kollege
