Johannes 14: 8-17 (AFR2020)
’n Belofte is ’n belofte en God bly konsekwent. Die uitstorting van die Heilige Gees is die vervulling van Christus se belofte aan sy dissipels. Soos Hy beloof het: En Ek sal die Vader vra en Hy sal vir julle ’n ander Parakleet gee. Sy koms beteken dat daar ’n totaal nuwe verhouding tussen God en sy kinders geskep is. Johannes 14 leer ons dat dié Parakleet die Gees van waarheid is. Hy kom van God en Hy is bekend met wat God wil. Hierdie Gees sal in gelowiges wees en by hulle woon. Op grond van die verhouding tussen Jesus en die gelowiges, sal hulle die Gees ken.
Die Heilige Gees kom bly en woon in die dissipels. Hoe groot is die troos wat God deur die Parakleet aan sy kinders gee! In die ure van benoudheid is dit die Gees van God wat ons die sekerheid van die sorg en bystand van die Here gee. Die koms van die Christus is ’n fase van hoop en blydskap. Wanneer Jesus daarvan praat dat Hy na die Vader gaan, praat Hy van die mag as sy triomferende wat heengaan, teenoor die nag van verskrikking wat vir Hom voorlê (14: 18). Hy vertroos hulle egter: Ek laat julle nie soos weeskinders agter nie.
Die Gees van die waarheid, Hy sal die toekoms verkondig (môre) en gelowiges van hul kindskap verseker (nou).
Hoe onderskei ’n mens tussen die getuienis van die Gees en dié van ons eie gees van sondaar wees? Die mens se gees voer jou weg van God en Christus af. Die boodskap van die Heilige Gees verskerp die fokus op wie Christus eintlik is!
O Gees van Vader en van Seun, ons voorspraak, leidsman, krag en steun,
U, vul ons diepste hartsverlange, U kom ons in die waarheid lei,
U leer ons bid, kom by ons bly – U loof ons met ons lofgesange!
Wil steeds die goeie in ons werk, bewaar, vermeerder en versterk.
U maak die Skrifte vir ons oop; bekeerdes, deur die Gees gedoop,
ontvang met blydskap skuldvergewing.
(Gesang 431: 1-2)
Ds Kathleen Smith, Kaapstad
