Openbaring 3: 7-13
Vriend van God:
Drie vroue is op pad na die graf van Jesus om sy liggaam te gaan balsem. Hulle het ’n probleem. Die klip wat voor die opening van die graf gerol was, was baie groot! Wie sal vir ons die klip wegrol? het hulle gevra (Mark 16: 4). Ons hoop maar dat ons dit dalk sal regkry of dat daar iemand sal wees wat ons kan help. Hul hoop en verwagting. Ons weet dat toe hulle by die graf kom, daardie klip reeds weg was. Die graf oop en leeg! Die dood se bande gebreek. Kyk, Ek het ’n deur (klip) voor julle oopgesluit…
Vriend van God, vir ons wat glo dat Jesus die Christus, die Seun van God is, ons wat op pad is na die graf, sê die Heidelbergse Kategismus in die antwoord op vraag 42: Ons dood is nie ’n betaling vir ons sondes nie, maar slegs ’n afsterwe van die sondes en ’n deurgang tot die ewige lewe. ’n Deurgang! Die voorhangsel het van bo tot onder middeldeur geskeur.
Ons kan terugkeer na die Vader. Met hierdie sekerheid kan ons elke dag leef. Méér nog, ons leef nie net met verwagting nie, maar blye afwagting dat Hy wat die dood verslaan het en as Koning regeer, weer sal kom. Dat alles nuut gemaak sal word. Wanneer? Die tyd het die Vader in sy eie mag bepaal. Dit kom.
Die vraag is net: Hoe en waarmee is ons in hierdie tyd van afwagting besig? Kan ons die woorde van Jesus in Johannes 17: 4 ons eie maak? Ek het U verheerlik deur die werk te volbring wat U my gegee het om te doen. Terwyl ons in afwagting leef, moet ons weet, die beproewings en versoekings gaan nie minder word nie. Vriend van God, ek vra jou, volhard met blye afwagting.
Omdat julle aan die boodskap van my volharding in lyding vasgehou het, sal Ek julle ook vashou in die tyd van beproewing… (Op 3: 10).
Ds Hennie Aucamp (25/02/1949 — 04/10/2024)
