1 Johannes 3: 18-24
Was jy ook op laerskool in ’n verhouding met iemand waar albei van julle so skaam was vir mekaar dat julle amper nie eens gepraat het nie? Vir my het dit so gebeur dat ek op ’n dag hierdie meisie op die skoolstoepe gewaar. Blitsvinnig het ek in ’n gang verdwyn sodat ek nie in daardie ongemaklike posisie sou beland waar ons moet gesels en mekaar in die oë kyk nie. Van ver af hoor ek haar toe roep: Jy kan maar “Hallo” sê!
In hierdie brief van Johannes roep hy die gelowiges op om nie in ’n verhouding soos daardie laerskoolverhouding met die Here te leef nie. Die Here het ons in hierdie pragtige skepping geplaas om in ’n egte, liefdevolle verhouding met God en ons naaste te leef. Dit beteken ons kan nie net hier en daar vir mekaar waai nie. Ons kan nie net met woorde liefhê nie, sê Johannes, ons moet met dade in waarheid mekaar liefhê. Met ander woorde, ons moet heelhartig met ons hele menswees liefhê, deur wat ons sê en wat ons doen. Dit is hoe ons van laerskoolverhouding na ’n ware liefdesverhouding kan oorgaan.
As kinders van God kan ons nie in die gange wegkruip en bloot vir die Here waai in die verbygaan nie. Die Skrif roep ons op om in ’n egte verhouding te wees. ’n Verhouding waar ons ons trots in ons sak steek, broos en weerloos voor die Here en ons naaste staan, en Hallo sê. ’n Verhouding waar mense van buite nie hoef te wonder of ons werklik in ’n verhouding met die Here is nie, maar sonder twyfel kan sien ons is onafskeidbaar van die Here.
Gebed
Here, ons Here, laat ons in verhouding met U leef deur in die Naam van Jesus Christus te glo en mekaar lief te hê volgens die gebod wat U aan ons gegee het. Amen.
Ds Schalk Zastron, Ermelo
