Efesiers 4: 19-22
Paulus skryf dat hierdie gemeenskap van gelowiges eens ver van God gelewe het, maar nou naby gekom het deur die bloed van Jesus. En in hierdie Skrifgedeelte gebruik Paulus verskillende beskrywings, naamlik medeburgers, huisgesin, gebou, tempel en geestelike huis, om die plekke te beskryf waarin God woon. Die kerk as liggaam van Christus is nou die beeld van God, die Imago Dei (Gen 1: 21). Dus het ek en jy as gelowiges ’n groot taak om na die beeld van God te lewe. As gemeenskap van gelowiges is dit noodsaaklik om so te lewe dat ons mense sal lei tot ’n ontmoeting met die lewende God. Laat ons meer vir mekaar bid vir bevryding en geestelike vernuwing. Gebede bring God en mens bymekaar!
Gebed
Hemelse Vader, ek weet hoe belangrik mense en verhoudings vir U is. Een van die grootste opdragte wat U vir ons gegee het, is om mekaar lief te hê. Dit is vir U aangenaam en is vir U goed. Heer, ek bid vir genesing in al die verhoudings in my lewe waar daar verwonding is. Waar vertroue verbreek is, mag die vertroue herstel word. Waar daar onversoenlikheid is, mag daar vergifnis kom. Mag daar oorvloedige liefde wees waar daar vroeër twyfel en wanhoop was. In sommige verhoudings is dit moeilik om u opdrag na te kom. Soms is dit byna onmoontlik om iemand lief te hê. Ek vra vir buitengewone krag in u Naam, sodat ek kan liefhê soos U van my vra. Deur u liefde en mag, help my om elke gebroke verhouding in my lewe te herstel. Ek bid vir groter welwillendheid, deernis en geduld met al die mense in my lewe. Seën my verhoudings – met my lewensmaat, my reisgenoot, vriend of vriendin, my kinders, my ouers, vriende en kollegas. Help my om bedagsaam en simpatiek te wees met elkeen wat my pad kruis. In Jesus se Naam. Amen.
Ds Lana van Rensburg, Koedoesrand
