Openbaring 21: 1-8
Vriend van God:
Dit is met huiwering dat ek jou op hierdie dag, die dag van die Here, so groet. Die voorafgaande ses dae het ek ’n doelbewuste fout gemaak soos wat ons meer dikwels maak as wat ons besef. Ons laat alles net om die mens draai. Wat is in jou beplanning vir die dag en week?
Ses dae was ons fokus net op die mens. Ons hoop. Ons verwagtinge. Wat van God, ons Hemelse Vader? Het Hy nie ook bepaalde verwagtinge gehad wat in vervulling moes gaan nie? Hy maak die mens na sy beeld as sy verteenwoordiger met bepaalde verwagtinge. Hy plant vir Hom ’n wingerd. Hy verwag dat daar vrugte sal wees. Wat kry Hy? Dorings en onkruid wat versorg word. Hy vra gehoorsaamheid. Daar word met ongehoorsaamheid geantwoord.
Begryp ons die droefheid, die seer, die teleurstelling in die Vaderhart? Wie is daarvoor verantwoordelik? Ons kan nie die vinger na ander wys nie. Ons sal ons koppe in skaamte en skande moet laat sak. Wat het ons aangevang? Kan ons ons nog vriend van God noem? Nie dalk eerder vyand van God nie?
Wat kan Ek nog vir my wingerd doen? vra God in Jesaja 5: 4. Sy onbegrensde liefde wat uitloop op selfvernedering. Menswording in Jesus. Versoek, verlaat, gevange geneem. Verloën. Onskuldig bevind, maar tog oorgelewer. Bespot. Verneder. Gekruisig. Begrawe. Opgestaan as Oorwinnaar. Opgevaar.
Hy, God ons Vader, skep vir ons ’n nuwe verwagting. Ons kry danksy die selfopofferende liefde ’n nuwe naam. Nou nie meer Vriend van God nie, maar Kind van God. Vir ons is die woorde van Jesaja 43: 1 waar: Moenie bang wees, Ek het jou lief. Ek het jou op jou naam geroep. Jy is Myne!
Kind van God, al het jy Hom bedroef, mag jy ervaar dat jy elke oomblik in sy skadu staan.
Ds Hennie Aucamp (25/02/1949 — 04/10/2024)
