1 Petrus 2: 1-3
Mense wat die voorreg het om deur die land, selfs die wêreld, te reis, word baie gou bewus van die grootheid van God se skepping. Dit is aangrypend om oor die berge en vlaktes te staar met die wete dat alles in die sorg van ons Skepper se hande lê. Wat ons egter deur die medici en wetenskap ontdek, is dat daar net soveel wonders en almag van God te siene is in die kleiner dele van die skepping ook. So ontdek ons selfs met ’n bietjie aandag die wonderwerke wat lê in alledaagse verskynsels.
Wanneer ons gaan lees oor borsvoeding soos wat Petrus dit hier beskryf, sien ons dit is niks anders nie as ’n wonderwerk en geskenk van God. Daarom is dit eintlik so besonders dat Petrus hier die verhouding wat ons met God bou, en die dors wat ons het na die wil van God, beskryf met ’n wonderwerk soos borsvoeding. ’n Wonderwerk waar ’n baba deur ’n moeder gevoed word met alles wat nodig is, en terselfdertyd word die band en verhouding tussen baba en moeder versterk. So is dit met die gelowige wat intensioneel tyd met die Woord van God deurbring.
’n Verdere interessante gedagte rondom ’n baba se voeding is dat dit ook elke vier ure moet gebeur. Dit is nie ’n weeklikse of maandelikse instelling nie. Hierdie dors is in die vroegoggend, laatoggend, vroegmiddag, laatmiddag, vroegaand en laataand. ’n Dors wat die heeltyd daar is en groter word.
Mag dit wees dat ons ook groei in geloof en ons geloofsverhouding deur te smag soos pasgebore babatjies na die suiwer geestelike melk.
Gebed
Dankie, Here, dat U ons liefhet soos ’n moeder haar baba. Laat ons so op ons beurt na U smag, soos ’n pasgebore baba, na suiwer geestelike melk. Amen.
Ds Schalk Zastron, Ermelo
