1 Korintiërs 3: 16-17 (AFR2020)
Weet julle nie dat julle ’n tempel van God is, en dat die Gees van God in julle woon nie? (vers 16).
Die tempel in ou Israel was die hart van Israel se godsdienstige lewe. Eers was daar die tabernakel wat telkens opgeslaan en vervoer is. Jy kan vandag ’n lewensgrootte replika van die tabernakel by Timnapark in Israel besigtig (googleloer gerus). Dit was eers koning Salomo wat die eintlike tempel in Jerusalem op die tempelberg (Sion) gebou het. Hierdie eerste tempel is in 586 vC deur die Babiloniërs vernietig. ’n Tweede tempel is gebou, wat later deur Herodes heeltemal oorgebou is tot ’n asemrowende en manjifieke struktuur. Wanneer Paulus oor die gelowiges as tempel van God skryf (54 of 55 nC), het hy waarskynlik hierdie majestueuse tempel in gedagte.
Dit was elke Joodse gelowige se droom om ten minste eenmaal in sy of haar lewe die tempel te besoek. Dink maar aan die talle Psalms soos Psalm 84: My hele wese verlang, ja, smag na die voorhowe van die Here … Selfs ’n mossie vind ’n tuiste, en ’n swaeltjie haar nes… by u altare … daar waar ’n pelgrim verskyn voor God in Sion (verse 3, 4 en 8).
Paulus heg ’n diepere betekenis aan die tempel deur gelowiges as die tempel van God uit te beeld: Weet julle nie dat julle ’n tempel van God is nie? Voeg daarby dat die Gees van God in hierdie lewende tempel woon. 1 Petrus 2: 5 sê: … en laat julle as lewende klippe opbou tot ’n geestelike huis…
Ons elkeen is ’n lewende klip en saam word ons as tempel van God opgebou: ...want die tempel van God is heilig, en dié tempel is julle (1 Kor 3: 17). Ons is volgens 1 Petrus 2: 5 ’n heilige priesterdom, om geestelike offers te bring wat, deur Jesus Christus, vir God aanneemlik is.
Die hele week se oordenkings het oor die bouwerk aan onsself as tempel van God gehandel. Kom ons wees ’n Geesvervulde tempel wat inspireer – ’n heenkome vir pelgrims wat op soek is na sin en betekenis.
Dr André Ungerer, Hervormde Teologiese Kollege
