Jesaja 62: 1-5
Ons ervaar dikwels dat God onverstaanbaar is. Ons begryp dikwels nie God se werkwyse nie. En selfs die Bybel help ons nie baie met hierdie onverstaanbaarheid van God nie. Iemand het gesê die Bybel teken God as veelkantig, veelsydig, veelkleurig. Dit lyk of God soms in teëspraak met Homself is. Op sekere plekke in die Bybel word gesê dat Hy altyd dieselfde is, dus nie verander nie. Op ander plekke sê dit dat Hy wel verander. Soms sê die Bybel dat God geweldig magtig is; op ander plekke teken die Bybel Hom as weerloos, asof ’n mens Hom werklikwaar kan weerstaan. Soms sê die Bybel dat God hoog is; op ander plekke dat Hy laag is. Op baie plekke word gepraat van sy liefde; maar op net soveel plekke word gesê dat Hy regverdig is, dat Hy sonde haat en dit straf.
God is veelkleurig, verskriklik ruim. Al het God alle rede gehad om ons te vernietig, uit te delg, was sy liefde en sy deernis te groot. In die Skrifgedeelte word dit op ’n aangrypende manier verbeeld. Die beeld van ’n verstote, verlate vrou word gebruik om ons te teken. Hierdie vrou is ’n gevalle vrou, een met ’n reputasie, een wat haar naam weggegooi het. En nou is dit die wonder van hierdie gedeelte: Die vrou, met die reputasie, wat haar naam weggegooi het, kry ’n nuwe naam: Jy sal nie meer die verstote vrou genoem word nie. Jy sal genoem word: “Die een vir wie die Here liefhet.” Die vrou met die reputasie word ’n gerespekteerde bruid, een wat gekoester word met die liefde van haar Bruidegom. Sy is volkome in sy hande, sy sorg.
Wat jou situasie ook al is, wat jou geheime seer ook al mag wees, hierdie is woorde wat troos: Al is jy in ’n situasie waarin jy beleef dat God weg is – of dit nou is as gevolg van die rampe en teëspoed wat jou tref, soos jou stukkende huwelik, jou bankrot besigheid, jou siek kind of die dood van ’n geliefde, en of jy ook al van God probeer weghardloop het en vir ’n tyd lank gedink het jy kry dit reg, al sit jy op die ashoop van jou stukkend gebreekte lewe, jy kan weet: Jy sal nêrens heen kan vlug nie, want God is nie weg nie en jy ook nie. Hy is nie weg nie, want Hy het jou lief. Hy het juis na jou gekom in Jesus. Met die beeld van hierdie gedeelte sê Hy ook vir jou: Jy is my bruid, al het jy jou naam wegggegooi. Ek gee jou ’n nuwe naam.
Ds Lana van Rensburg, Koedoesrand
