Romeine 8: 31-39
Romeine 8 se laaste verse is ’n oorwinningslied van ’n oorwinningsfees. Elke Romeinse generaal en legioen wou graag fees vier, en het vir elke geleentheid fees gevier. Paulus gebruik sy oorwinningslied in Romeine 8 om te bevestig dat God oorwin het en dat niks tussen jou en jou liefde vir of jou verhouding met God kan staan nie. Geen vyand kan tussen jou en God staan nie. Paulus noem in die teksgedeelte ’n klomp dinge wat teen jou kan staan, dinge wat jou wil oorwin, jou lewe wil oorwin. Die belofte in die teksgedeelte is egter dat jou span nie net uit jou bestaan nie. Jy het Christus aan jou kant. God is nie jou vyand nie. Christus het jou reeds vrygespreek, daarom is jy vry om te lewe vir en saam met God.
Christus is Oorwinnaar, Christus het reeds oorwin. Die sonde is oorwin. Die dood is oorwin.
Die dood het voorheen lewe weggeneem, die dood het die gevolg gehad dat jou verhouding met God tot ’n einde gekom het. Jesus Christus het dit kom verander deur vir ons en in ons plek te sterf, sodat ons vir ewig ’n verhouding met God kan hê. Sodat ons vir ewig die oorwinningsfees kan vier.
Saam met Christus is jy oorwinnaar. Saam met Christus het jy ook reeds die sonde oorwin, saam met Christus het jy reeds die dood oorwin. Jy is oorwinnaar in die lewe. Jy lewe vir ewig in verhouding met God. God het reeds vir jou hierdie oorwinning, hierdie lewe en hierdie verhouding moontlik gemaak.
Gaan leef jou oorwinningsfees!
Ds Natasha Smit, Nelspruit/Barberton
