2 Korintiërs 4: 7
Die Woord beskryf ons as kleipotte wat maklik breek. Ons is geestelik, fisies en emosioneel breekbaar. Daarom moet ons onsself innerlik versorg, want ons dra God se kosbare skatte binne ons rond. Trouens, ons moet verstaan dat ons brose menslikheid eintlik een van die grootste kragte is wat ons het. As jy nie jou swakhede wegsteek nie maar dit wys, sal dit jou altyd dwing om op God te vertrou. James Hudson Taylor het gesê: All God’s giants have been weak people. Dit begin by jouself.
Die gedeelte sê vir ons duidelik dat ons krag opraak, maar dat ons kan bid en God se krag kan ontvang. Elkeen van ons loop die potensiële gevaar om uit te brand, elkeen van ons loop die potensiële gevaar om in ’n hoekie te gaan sit weens uitputting. Die gevaar is die onvoorspelbaarheid daarvan. Dat jy net op ’n dag kontak met jou gevoelens verloor het. Maar in en deur Christus is ons meer as oorwinnaars. Al lek jou kleipot kosbare water, het die fontein van Lewende Water nie opgedroog nie. Plaas jouself in die hand van die lewende God, laat Hom toe om jou lewe vol te maak.
Gebed
Onse God, God van die weduwee, die arme, die enkelouer, die vaderlose, God van almal. Here, ons kom vanoggend met eerbied en ontsag na U toe aan die begin van die nuwe dag. Here, ons het soveel op ons harte en in ons gedagtes. Die tyd waarin ons nou is, is onbekend en dit maak ons onseker, maar tog is ons bly om te kan uitsien na moontlike gebeure wat U vir ons beplan. Daarom rig ons ons gedagtes na U toe vanoggend, want dit is U en U alleen wat die sleutel het tot die lewe en die dood. Dit is U wat die krag, wysheid en insig vir ons gee. Dit is U wat die lewe vir ons moontlik maak. Here, U het ons al gelei deur diep waters, deur moeilike tye, en deur die goeie tye was die reënboogkleure helder, U is in alle omstandighede naby ons. Dankie, Here, dat ons kan uitsien na nog ’n dag saam met U, dat ons op u terme kan leef. Dankie vir u genade, dat U ons sondes skoon was, ons reinig en ons vlekloos laat. Help ons dat ons meer en meer soos U sal wees. In Jesus Naam bid ons hierdie gebed. Amen.
Ds Lana van Rensburg, Koedoesrand
