Prediker 11: 3-5

Die Afrikaanse uitdrukking rus vir jou siel verwoord ’n diep menslike behoefte. Wie die wind en wolke dophou, sal geen rus kry nie. Hierdie beeld van die Prediker druk iets uit van hoe mense angsvallig kyk wat daar buite aangaan en stres oor hoe dit hul lewe kan raak. Sal dit geluk of ongeluk bring? Wind en wolke kan ’n storm beteken, miskien selfs hael. Watter skade kan dit veroorsaak? Dalk val die groot boom op die huis. Sal die versekering uitbetaal? Met sulke bekommernis probeer mense oorleef en hulself beskerm. Hou die omgewing fyn dop sodat jy voorbereid kan wees as die krisis kom. Maar jy is nooit voorbereid nie en stres is nie goed vir liggaam of gees nie. Dit beroof jou van rus vir jou siel.

Terwyl Napoleon chaos in Europa veroorsaak, soek ’n bekende teoloog van Berlyn rus vir sy siel in die mooi dinge van die lewe. Hy woon musiekkonserte en poësie-aande by. Dit is goed vir sy siel, maar dit is gou verby. Dan moet hy terug na die lewe daarbuite. Om werklik rus vir jou siel te vind, is meer nodig as die mooiste produk van die menslike gees, meer as kuns en musiek. God se Gees is nodig. Net by God kom die siel tot rus. Die woord vir “wind”, “gees” en “asem” is dieselfde in die Hebreeuse taal van die Ou Testament. Wie wag op die wind, het geen beheer daaroor nie – die rigting, die sterkte, of watter kant toe die boom gaan val. Ook oor God se Gees het die mens geen beheer nie. Maar hierdie wind/gees vernietig nie. Dit is die asem van lewe. Selfs met ons wetenskap vandag weet ons nie hoe gees en die liggaam bymekaar kom om lewe te vorm nie. Ons verstaan ook nie hoe God se Gees en ons aardse mensheid bymekaar kom om ’n ander soort lewe te vorm nie. Maar ervaar ons dit en gee ons ons daaraan oor, kan ons egte, blywende rus vir ons siel vind.

Prof Yolanda Dreyer, Universiteit van Pretoria/Nederlandssprekende Gemeente

 

af
af
Copy link