Hebreërs 10: 19-24
Laat ons ook na mekaar omsien deur mekaar aan te spoor tot liefde en goeie dade (vers 24).
Die skrywer van die Hebreërs-brief hou daarvan om beelde te gebruik vanuit die leefwêreld van daardie tyd, beelde wat bekend was vir die mense vir wie dit geskryf is. In die Hebreërs-brief word die lewe van gelowiges vergelyk met ’n wedloop wat gehardloop word. Gelowiges se hardloop van die wedloop van die lewe verskil van die wedlope van atlete waar daar net een wenner is, omdat ons almal as ’n span hardloop. Ons is almal ewe belangrik vir God; jy is die wenner van die wedloop van jou lewe.
Wanneer mense in ’n groep of span saam hardloop, vra dit dat ons na mekaar omsien. Die Griekse woord wat ons vertaal het met aanspoor, is ’n baie sterk motiverende woord. Dit het ’n sterker en dieper betekenis as aanspoor, dit gaan oor ondersteuning, bemoediging, om iemand aan te hits, uit te lok, op te sweep. Die Engels is to provoke.
Ons behoort in ons onderlinge versorging mekaar aan te hits, uit te lok, op te sweep om in liefde met mekaar te leef. God se liefde te leef. Laat ons na mekaar omsien deur mekaar aan te spoor tot liefde en goeie dade. Hierdie manier van leef en optree, het ’n invloed op almal wat ons pad kruis, want dit gaan ook die manier waarop ons optree teenoor elkeen wat op ons pad kom, bepaal. Die uitsonderlike van die gelowiges in Rome was juis dit, dat hulle nie net goed was vir medegelowiges nie, maar goed was vir alle mense wat op hul pad gekom het, selfs dié wat hulle vervolg het.
Laat ons mekaar ook in die tye waarin ons leef, opsweep om God se liefde te leef, sodat ons met ons manier van leef, die manier waarop ons ons lewenswedloop hardloop, seker sal maak dat dié wat saam met ons leef en hardloop, moed hou, vertroos en versterk word deur dit wat ons doen en dit wat ons sê.
Dr Annelie Botha, Universiteit van Pretoria / Kempten
