Matteus 26: 26-35
Die bekende prediker Fred Craddock vertel ’n verhaal waarmee hy Nagmaal op ’n aangrypende wyse beskryf. Hy vertel hoe hy eenkeer in Kanada ’n lesing moes aanbied. Die koue het hulle daardie jaar onverwags betrap. Die sneeu was so erg dat die organiseerder hom laat weet het dat die seminaar afgestel is, maar net so om die draai van die hotel waar hy gebly het, was daar ’n restaurant wat oop was. Hy kan onthou dat hy glad nie voorbereid was vir die vreeslike koue nie. Hy het gesukkel om die hoteldeur oop te kry as gevolg van die sneeu. Net verby die bushalte af in die straat het hy die plekkie gekry wat nog oop was.
Toe hy instap, kon hy omtrent iemand van elke nasie sien. Al die rasse en tale was verteenwoordig. Hy het gelukkig in die besige plekkie ’n oop stoel gekry en gaan sit. ’n Kelner het nadergestaan. Wat gaan dit wees? Ons het net sop! het hy geblaf. Watter sop? vra Craddock. Sop, sop, het die kelner hom weer toegesnou. Dan is dit goed dat ek lus is vir sop. Craddock het geglimlag. ’n Rukkie later het die kelner sy sop gebring. Craddock sê hy het so afgekyk na die sop en hy kon nie bepaal watter tipe sop dit was nie. Dit was so ’n grys mengsel, en dit het nie na iets geruik nie, maar dit was goed genoeg om sy hande warm te maak.
Hy hoor die deur oopgaan en hy sien ’n meisie van die straat af inkom. Sy moes al ’n geruime tydjie op straat gewees het. Sy het gaan sit en die kelner het nadergestaan. Wat gaan dit wees? Sy antwoord: ’n Glas water, asseblief. Hy dring aan: Wat gaan jy eet? Sy sê: Net ’n glas water, asseblief. Ek het nie geld vir iets anders nie. Waarop hy toe reageer: As jy nie iets gaan eet nie, kan jy nie bly nie, daar is baie betalende kliënte.
Craddock vertel: So asof dit ingeoefen is, staan die hele restaurant se mense op, hy sê hy ook, hy weet nie hoekom nie, maar hy ook. En soos een man beweeg hulle na die deur. Ok! Ok! sê die kelner, ek sal vir haar sop bring… Nadat almal gaan sit het, vertel Craddock, het hy weer na sy sop gekyk. Iets was anders… dit het heerlik geruik! En het kleur gehad! En toe hy dit proe, smaak dit wonderlik, dit het vir hom amper soos wyn en brood geproe!
Dr Hein Delport, Swartkop
