2 Tessalonisense 1: 11-12
Ek het onlangs geleer wat gebeur met ’n springmieliepit wanneer dit van ’n pit na ’n popcorn verander. Die pit bestaan uit verskillende dele, maar die belangrikste vir die transformasie is die mikroskopiese druppels water wat binne-in die pit is. Wanneer jy die pitte in die mikrogolf plaas, is dit nie die dop wat warm word nie, dit is die water binne-in die pit wat warm word en stoom afgee; dit veroorsaak druk wat meer en meer word tot dit nie meer binne kan bly nie en die pit dan transformeer. Die pit het nie getransformeer omdat die dop warm geword het nie, maar omdat dit wat aan die binnekant is, warm geword het.
As ons altyd net op ons uiterlike fokus en probeer om ons optrede te verander, kry ons iets tydeliks. Wanneer ons slegs dit wat mense kan sien, verander, is dit tydelik. Dit verander nie wie ons is en wat ons dink en voel nie, en dit gaan net vir ’n rukkie so wees. ’n Mens word uitgeput, want dit vat energie om iets aan die buitekant te wees wat jy nie aan die binnekant is nie.
Maar wanneer ons op ons binneste fokus, dit wat die Heilige Gees besig is om met ons te doen, wanneer ons die binnekant warm maak, transformeer ons. Die teenwoordigheid en krag van God leef binne elkeen van ons. Die vraag is of ons dit toelaat om binne ons te werk en ons te transformeer.
God het elkeen van ons gemaak en Hy het ons geroep sodat ons sy Naam bekend kan maak aan mense wat nie fokus op dit wat aan die binnekant leef nie. Wanneer ons op die binnekant fokus, het ons nie nodig om te wonder of dit regtig ons werk is om die verskil in ons omgewing te maak nie. Ons kan dit weet, want ons is nie meer net ’n dop wat die Gees binnehou nie – ons laat toe dat die Gees ons en alles rondom ons transformeer wanneer ons op Hom fokus.
Ds Yvette Scholtz, Magaliesmoot
