Johannes 1: 5
In die Britse komediefilm Shaun of the Dead (2004) is die hoofkarakter ’n mislukte verkoopsman wie se lewe nie regtig rigting kry nie. ’n Mens sou kon redeneer dat hierdie man ’n doellose bestaan voer en dat hy ’n toeskouer van sy lewe geword het wat, stukkie vir stukkie, by hom verbygaan. Shaun is salig onbewus van wat in die wêreld rondom hom aangaan. In een toneel staan hy op en stap winkel toe, maar hy is onbewus van die Zombies wat rondom hom Londen oorval het. Hy stap by die winkel in, neem ’n roomys uit die vrieskas uit, sit die geld op die kassier se toonbank neer en stap weer terug huis toe, sonder om die Zombies in die strate te gewaar. Die Zombies was op daardie oomblik meer wakker en bewus as wat hy was.
Die film spreek op ’n komiese wyse tot ons menslike kondisie. In Christus se opstanding vier ons die Lig wat die donker oorwin het, maar sien ons nog hierdie Lig raak? Sien ons nog die Lig van Christus raak wat oral rondom ons skyn, of het die donker vir ons net te donker geword? Die evangelie het oral rondom ons hande en voete. Daar gebeur daagliks mooi dinge met mense wat andersins moedeloos sou gewees het. Sien ons dit nog raak, of loop ons soos Shaun rond, salig onbewus van die Lig wat in baie donker hoeke skyn?
Hoe kan ons die Lig sien? ’n Lied wat ons graag in die kerk sing, kan ons hiermee help: Ontwaak jy wat slaap (Ges 481). Dalk begin dit by die bewustelike keuse van waarna ons kyk? Dit begin by die keuse om wakker te word en op die uitkyk te wees vir daardie Lig.
Ons mag moontlik nie die Lig in ons gemaksones raaksien nie. Dit mag dalk van ons vra om die donker plekke bewustelik te gaan opsoek en Christus se handewerk daarin raak te sien. Mag ons bid vir nuwe oë om dié Lig raak te sien!
Ds Steve Oxton, Wapadrant
