Romeine 8: 9-11
Nie een van ons maak iemand anders emosioneel seer met die uitsluitlike doel om skade te doen nie. Ons ongeduld, frustrasie, verdedigende optrede of woedeuitbarsting is nie optrede wat ons vir die dag gekies het nie, maar iets wat vloei vanuit ons eie emosionele seer. Hierdie seer kan gewortel wees in slegte verhoudings of selfs trauma. Partykeer kan hierdie seer so diep lê dat ons dink dat ons nooit daarvan sal kan herstel en genees nie. Ons het die dele van ons wat lief het, geduld het en vertrou, begrawe toe dit deur iemand anders se seer die doodshou toegedien is.
Ek wil graag voorstel dat een van die vele lense op hierdie teks interne genesing is. Dieselfde Gees wat Christus uit die dood opgewek het, woon in my en jou. Hierdie Gees van God het opwekkingskrag. Hierdie Gees kan dit wat dood en verlore is, opwek en red. Soveel van dit wat ons sien as sonde, is eintlik ’n hulpkreet om genesing en herstel te kry van die seer en ongemak wat ons elke dag beleef.
Die gawe van die Gees in ons is dat hierdie trauma, hierdie seer, kan genees. As hierdie Gees Jesus uit die dood kon opwek, kan dit vir seker ook my en jou wonderbaarlik genees van die seer in ons lewens wat ons so gereeld jaag en ons gedrag bepaal. Wat sou gebeur as ek en jy geleentheid gee vir hierdie Gees van God om die dele in ons wat liefde wys, geduld het, vrede bewerkstellig en ander seer en emosioneel gebroke mense bystaan, op te wek uit die dood? Dit gaan egter beteken dat ek en jy God moet toelaat in die stukkendste en mees gebroke dele van ons psiges en gedagtes. Ons sal die Gees moet toelaat in die plekke waar ons hierdie liefde, geduld en vertroue begrawe het.
Ds Thomas Dreyer, Malelane
