1 Johannes 1: 1-4
Almal is op soek na lewe, en soms dink ons dat die lewe of die ware lewe aanbreek wanneer ons iets bereik, of selfs wanneer ons iets bymekaar gemaak het, of in besit is van iets.
Wanneer Jesus Christus mens word en die Woord van God kom uitleef op aarde, word die woorde oor die ware lewe uitgeleef. 1 Johannes is die brief van Johannes wat ooggetuie was van Jesus Christus se lewe. Johannes getuig in hierdie brief dat Jesus vir ander lewe gebring het, dat Jesus die ware lewe uitgeleef het. Hierdie woorde is nie meer net woorde nie, maar ’n lewe met aksies en optrede. Hierdie ware lewe het hulle self ervaar, die lewe is aan hulle, die getuies, geopenbaar en hulle kon dit sien, sodat hulle aangeraak word om die ware lewe uit te leef.
Hierdie ware lewe het Jesus ook aan ons geopenbaar en aan ons gebring met die herstelde verhouding wat tussen God en mens ’n werklikheid word. Die ware lewe is om vir ewig te lewe soos Jesus dit kom gee het en soos ons dit ontvang het. Jesus het die ware lewe vir ons kom wys, sodat ons weet hoe om dit te leef. Die ware lewe is aan ons gegee met die kruisiging en opstanding. Die ware lewe is daardie lewe in verhouding met God, daardie optrede wat getuig van ons verhouding met God.
Jesus Christus het die ware lewe vir ons kom wys om ons bewus te maak van wat dit is en hoe dit geleef moet word. Nou is dit ons geleentheid om die ware lewe te leef. Dié lewe wat reeds aangebreek het, kan ons nou lewe. Ons kan maar ophou om goedere en prestasies bymekaar te maak sodat ons voel dat ons die lewe het, of die ware lewe leef. Want die ware lewe is reeds aan ons gewys en gegee, en nou is dit ons voorreg om dit aan ander te wys en dit te leef.
Ds Natasha Smit, Nelspruit/Barberton
