Johannes 14: 15-17
Ons word elke dag gekonfronteer met uitdagings. Geweld, politiek, familie, werk en al ons verhoudings. Soms voel dit of hierdie lysie elke dag net langer word. Hierdie uitdagings kry ons onder. Dit maak ons kwaad, ons voel magteloos en gefrustreerd. Ons honger na geregtigheid groei soos ’n monster binne ons en draai ons fokus weg van die hoop, liefde en vreugde wat God elke dag so vrylik vir ons gee.
Die Heilige Gees word soms gesien as ’n gewete wat bo-oor jou hang en wag vir jou monster om uit te kom, maar die Heilige Gees is ons vriend wat langs ons stap. Sy sagte teenwoordigheid word soms met soet heuning vergelyk. Hierdie gevoel kan vergelyk word met die bymekaarkom van vriende wat mekaar jare laas gesien het, of ’n kind wat terugkom huis toe. Daardie kind wat terugkeer na sy ouerhuis, voel die oorweldigende liefde en warm omhelsing. In daardie oomblik weet hy, hy is tuis en veilig. Die Heilige Gees se teenwoordigheid maak alles reg, gee ons hoop en herstel in ons harte die leë gat. God het nie die Gees gestuur om ons te veroordeel nie. Daardie prys is reeds deur Jesus Christus betaal. God het die Heilige Gees gestuur om ons aan Jesus se waarheid en liefde te herinner. Hy is die ewigdurende dryfkrag wat ons laat opstaan en voortgaan. Hy sal ons nooit verlaat nie, en die beste is dat sy warm teenwoordigheid reg staan as ons wil breek.
Lees hierdie teks met die fokus op die Heilige Gees. Wie is die Heilige Gees? Wat sê Jesus vir ons? Die woorde van Jesus word elke dag vir ons lewend gemaak deur die Heilige Gees. Laat jouself toe om deur die Gees herinner te word, en luister hoe die Gees die woorde van Jesus Christus ook in jou lewend maak.
Ds Thomas Dreyer, Malelane
