Esegiël 37: 1-14
Esegiël sien ’n visioen waar bene dood is en verspreid lê. Daar is nie ’n moontlikheid van lewe vir hierdie bene nie, maar dan begin hierdie bene wat dood was, om weer te lewe. In hierdie visioen sien Esegiël dood oral om hom lê, maar dan, na die dood, is daar lewe. Die dood word lewe. Dit is nogal vreemd, want die mens is gewoond aan lewe eerste en dan daarna dood. In hierdie visioen kom dit omgekeerd voor – dood en dan lewe. In die Ou Testament het dit nie algemeen voorgekom om te praat oor lewe na die dood nie. Daarom is hierdie visioen van Esegiël vreemd vir sy tyd.
Maar die visioen wil die boodskap bring dat die Here lewe kan bring waar daar dood is. Die Woord van die Here, die Gees van die Here, het oor die bene gekom en die bene wat dood is, het begin lewe. Die visioen lê ook klem op die vier windrigtings waar God in beheer is. Dit dui op God wat almagtig is, God wat oral is, God wat beheer het oor die lewe en die dood.
Die bevestiging en die belofte wat ons in hierdie visioen hoor, is dat die Here in beheer is. Dit is waaraan ons vashou en dit gee vir ons hoop vir die toekoms en vir die onbekende. Ons hoef nie bekommerd te wees oor die dood of die vreemde wat voorlê nie. Die feit dat die Here in beheer is, gee vir ons hoop vir die lewe wat voorlê, dit gee vir ons hoop vir die lewe na die dood, hoop vir die lewe wat vir ewig duur. Hierdie visioen van Esegiël gee vir ons hoop om aan vas te hou, want die Here is in beheer, en ons sal leef.
Ds Natasha Smit, Nelspruit/Barberton
