Lukas 14: 15-24
In die eerste-eeuse Mediterreense milieu was die hou van maaltye ’n manier om met mense van dieselfde sosiale stand en klas geassosieer te word. Mense se sosiale status het bepaal watter groepe met mekaar assosieer.
Baie interessant wys die argeologie uit dat binne die stadsmure van Jerusalem die elite en die werkersklas fisies geïsoleer van mekaar was deur ’n muur wat die middestad van die res van die stad geskei het. In die middestad was gewoonlik die paleis, tempel en huise van die elite – dié met status en mag. Afgesien van die skeiding tussen die twee sosiale groepe binne die stad, was daar ’n derde groep mense wat gemarginaliseer is tot buite die stadsmure. Hulle was die agtergeblewenes, prostitute, bedelaars en melaatses. Dié waarmee niemand wil assosieer nie.
Nadat niemand van die welgestelde gaste by die gasheer se maaltyd opgedaag het nie, besluit hy dat hy die werkersklas wat in die res van die stad woon, sal nooi: dié in die strate en gangetjies van die stad (vers 21), asook die gemarginaliseerdes buite die stad in die paaie en lanings (vers 23) wat hom nie ’n ete kon teruggee soos hy vir hulle wil gee nie.
’n Maaltyd is alleen ’n feesmaal indien daar nie verpligtinge op die genooides geplaas word om dieselfde aan die gasheer te bewys nie. Die oproep is onvoorwaardelike liefde om aan iemand goedheid te bewys al kan die persoon ’n mens nie terugvergoed nie. ’n Maaltyd is alleen ’n feesmaal deur almal om jou tafel welkom te heet en nie net die gaste van ’n mens se eie kringe nie. Die oproep is dat ons as Kerk sal uitreik na dié in nood.
Verder is óns die genooides omdat die Here deur sy onvoorwaardelike liefde ons geroep het van die strate en gangetjies van ons doellose bestaan in sonde. Niemand word ontsien nie – ons word selfs genooi waar ons verder is soos van paaie en lanings. In hierdie gelykenis het Jesus aangedui dat alle “mure van skeiding” tussen mens en God afgebreek is en dat ons daardie “mure van skeiding” in ons verhouding met ons naastes ook moet afbreek. Amen.
Ds Rudi Janse van Rensburg, Swellendam
