Efesiërs 4: 22-24
As jy al ooit probeer het om jou lewe en gesondheid om te draai met die een of ander dieet, dan weet jy presies hoe dit voel om te kul. Jy weet hoe dit voel om so ver van jou doelwit te voel dat niks in die wêreld die gaping kan vul nie. Nou begin die monster van vrees in jou groei en die duiwel gebruik al jou swakpunte om jou te oortuig dat jy dit nooit sal maak nie. Ek het in ’n stadium ’n liedjie van Casting Crowns geluister waarin hulle sing dat die put waarin ons onsself gooi, nooit diep genoeg gaan wees om ons van God weg te steek nie.
So, waar laat dit ons? God het gesê Hy stuur vir ons ’n Helper. Hierdie Helper herinner ons nie net aan die waarheid nie, maar is die brug vanaf ons vrese na God se liefde en vergifnis. Die probleem is wel dat ons nie hierdie Brug vertrou nie. Dit is soos om aan ’n harnas van ’n zipline te hang en te vrees jy gaan val. In werklikheid gaan niks met jou gebeur nie, maar jou realiteit is jou vrees. Jou hele liggaam word oorheers deur die vrees en nie die geloof in die brug nie. Hoekom voel dit altyd asof die ergste met ons gaan gebeur? Hierdie gevoel gebeur wanneer ons staatmaak op ons valse vrese en nie op die brug wat die Heilige Gees vir ons bied nie. Hierdie ewige, stewige brug wat lei na ons God wat wag om jou met sy liefde en vergifnis te oorweldig!
Hou op bang wees! Lees hierdie teks en laat toe dat die Heilige Gees die leuens uitdoof en jou lei na die plek van vergifnis en liefde, onder God se vlerke.
Ds Thomas Dreyer, Malelane
