Genesis 3: 22; Openbaring 22
Het julle al opgemerk hoe baie die boom van die lewe rondom ons voorkom in ons wêreld? Die boom van die lewe is oral in ons lewens te sien. Ons sien die boom van die lewe wat as kuns teen mure hang, of as hangertjie of oorbelle gedra word, sleutelhouers en nog baie meer. Was hierdie boom van die lewe al ooit vir jou meer as net ’n mooi kunswerk?
Hierdie boom van die lewe is die boom wat lewe vir altyd gee, maar daar is die waarskuwing om nie van hierdie boom te eet nie. Die boom van die lewe verteenwoordig onsterflikheid en word verbind met die eskatologiese belofte, die eindtyd. In die tuin van Eden het die boom van die lewe ’n besondere funksie as simbool van God se lewegewende teenwoordigheid. Vanuit die ou volkere het die mens ’n hunkering gehad na lewe vir ewig omdat hulle gevrees het vir doodgaan. In die Ou Testament is die boom van die lewe die beeld, die simbool, vir dit waaruit lewe vloei.
In Openbaring kom die boom van die lewe ook voor. Die boom van die lewe dien hier as simbool van genesing of heling en onsterflikheid vir die gelowige. Dit is simbool vir die lewe wat die gelowige vir ewig gaan leef deur die kruisiging van Jesus Christus wat juis hierdie lewe vir ewig oopsluit.
Die boom van die lewe herinner ons aan ’n lewe van volheid en ’n lewe vir ewig wat ’n werklikheid is in Jesus Christus. Ons is dankbaar dat ons nie meer hoef te vrees vir die dood nie. Mag die simbool van die boom van die lewe, wat oral rondom ons is, ons herinner dat God lewegewend teenwoordig is in ons lewe en dat ons die ewige lewe ontvang het.
Ds Natasha Smit, Nelspruit/Barberton
