Jakobus 3: 1-12
Kom ons begin vandag nie by die mens en ons onvermoë om ons tonge te beheer nie. Kom ons begin vandag by die krag van God se Woord. Die Woord wat geskep het aan die begin en lewe tot stand bring. Die Woord wat Israel gelei het deur sy profete na die beloofde land en verder. Die Woord wat mens geword het en waardeur God die nuwe begin geskep het. God is Woord, en dis vandag nog net so kragtig en lewend soos toe. Hy herskep steeds elke dag deur sy Woord mense se lewens.
Jakobus raak baie prakties as hy met gelowiges praat. Sy boodskap is deurgaans dat ons moet leef wat ons glo. Die grootste misverstande oor Christene in ons wêreld is juis omdat wat ons bely en wat ons doen nie altyd bymekaar uitkom nie; dat ons op Sondag een ding bely, maar in die week is daar niks daarvan in ons lewenswyse te sien nie.
Woorde kan ’n positiewe uitwerking hê, soos ’n stang in ’n perd se bek wat hom in die regte rigting stuur. Dit kan ook baie negatief en vernietigend wees, soos ’n klein vuurtjie wat ’n groot en skadelike brand kan veroorsaak. Jakobus gee ons baie goeie raad: Wees flink om te luister en stadig om te praat.
Die goeie nuus is dat die Gees gekom het om ook ons tonge en woorde te gebruik om lewe te spreek, eerder as dood. Om heel te maak en lig te bring, eerder as donkerte. Met die tong kan ons mense se hartseer verlig, ons kan bemoedig en nuwe lewensmoontlikhede oopmaak. Jou woorde het die krag om die lig in mense se lewe te bring. Konsentreer op al die positiewe in jou lewe, vul jou denke met dankbare gedagtes, en beveg die neiging om oor te gee aan die negatiewe en die donkerte in jou lewe. Jy het die krag van God tot jou beskikking – leef voluit daarin.
Ds Heloïse Herbst, Rietvallei
