Miga 5: 1
Betlehem was die stad waaraan Josef eintlik behoort het as afstammeling van Dawid. En so was Josef en Maria op pad daarheen om hulle deel van die volkstelling te maak. Die keiser het ’n volkstelling gehou. Sy tellery het om belasting gegaan. Hy wou weet hoeveel mense daar is, sodat hulle belasting kon betaal. Almal moes getel word. Josef en Maria was dus amper soos pionne op ’n skaakbord. Die keiser het hulle en al die ander mense na sy begeerte heen en weer geskuif. So gesien, is Josef en Maria die slagoffers van die keiser se besluit.
Ek voel ook so en sekerlik jy ook. Dat ons as pionne heen en weer geskuif word. Net ’n identiteitsnommer, dit is maar al wat ons is. Ander besluit oor ons lewens en wat ons behoort te doen. Ons brom dikwels oor die manier waarop dinge gebeur. Ons voel magteloos en doen maar net wat ander oor ons besluit.
Maar daar is ook ’n ander hoek waaruit ons daarna kan kyk. Op ’n vreemde manier het keiser Augustus se plan om mense te tel, ’n belofte in vervulling laat gaan wat God al lank tevore gemaak het in Miga 5: 1. Wie is dan eintlik die pion op die skaakbord? God het dié profesie van Jesus se geboorte in Betlehem lank tevore laat opteken. En dit is sy besluit wat hier die deurslag gee, wat ’n mens laat besef dat dit eintlik God se hand is wat ons bespeur in die sensus van die keiser. God stel sy eie besluit in werking. Augustus mag die kitaar slaan, maar dit is God wat die melodie bepaal. Uiteindelik is die “keisers” pionne in God se hand, eerder as andersom.
God is altyd in beheer van jou lewe. Maak nie saak wat jy alles hierdie jaar moes deurmaak nie – dalk ’n geliefde verloor, dalk siekte en lyding. Dalk was dit ’n goeie jaar. In alles wat ons meemaak, is ons nie maar aan die noodlot uitgelewer nie, want God is in beheer.
Ds Lammert van Rooyen, Lichtenburg-Oos
