Romeine 12: 1-2
Medici is uitgesproke oor hoe ons liggame aanmekaar gesit is. Frases soos Jy is jou brein en Dit is in jou DNS word oor ons uitgespreek as ons op ’n sekere manier optree. Die meeste mense vererg hulle en sê dan: Dit is maar net hoe ek gemaak is. Hierdie uitroepe is net ’n skadu van wie jy is, maar definitief nie hoe jy gemaak is nie. In die fliek The Shack is Mac alewig kwaad vir God en wil hy niks van vrede of vreugde weet nie. God besluit dan om Mac op ’n reis te neem wat sy brein nooit sou kon opdroom nie. Al die dokters in die spreekkamer het gesê dat hy gedroom het en dat dit wat hy beleef het, onmoontlik was, maar God doen altyd die onmoontlike. Hy is immers God bo ons verstand.
In die weke wat na sy insident volg, is hy vreugdevol en so vol lewe dat sy vrou dit nie kan glo nie. Mac het ten spyte van die wêreld se kommentaar vas bly staan op sy waarheid. Hy het vas bly staan by sy belewenis met die Heilige Gees. God se Gees help ons, herinner ons aan waarheid, en neem ons ook op die ongelooflikste reise. Hierdie teks is vir my so besonders omdat ons aangemoedig word om nie soos die wêreld te wees. Moenie die leuens glo nie. Jy is nie jou brein nie. Jy is nie jou biologie nie. Jy is nie wie die wêreld sê jy is nie.
Elke dag word jy gebore met nuwe neurone in jou brein wat wag om ’n konneksie te maak en ’n impuls deur te voer. Elke dag het ons opnuut ’n keuse om vas te staan op God se beloftes, of deur die wêreld ingesluk te word. In Deuteronomium 30: 19-20 hoor ons hoe God ons elke dag voor die keuse stel. Bid en vra die Gees van God om jou te lei, want jy gaan nie altyd sterk genoeg wees om die keuse van lewe te kies nie.
Ds Thomas Dreyer, Malelane
