Matteus 6: 5-15
Die Onse Vader-gebed lê elke gelowige na aan die hart. Hierdie gebed eggo deur kerkgeboue en Christelike huise. Dit is die grootste en die bekendste gebed. Die Onse Vader-gebed vra vir die openbaring en die bekendmaking van hoop vir alle mense.
Die hoop waaraan die meeste Christene vashou, is die koninkryk van God. Laat u koninkryk kom is die smeking na God se geregtigheid en God se regverdigheid, want God is reg en God tree regverdig op teenoor God se kinders. Die wêreld moet verander en transformeer om ’n plek van geregtigheid te word. Nie die geregtigheid van die mens nie, maar die geregtigheid en die regverdigheid van God. Dit sluit nie net die plek of ruimte waar God regeer in nie, maar ook die manier, die styl waarop God regeer. God se kinders ervaar die geregtigheid en die regverdigheid van God, en daarom leef God se kinders die geregtigheid en die regverdigheid van God ook uit in die wêreld. Die koninkryk van God is nie gewelddadig nie, en reageer nie met geweld teenoor die wêreld nie. In die koninkryk van God het God se kinders genoeg en ervaar hulle dat God heers en in beheer is.
Jesus leer vir sy dissipels en vir ons om só te bid tot God en te vra dat die koninkryk van God sal kom. Dat hierdie wêreld sal verander en transformeer weg van die koninkryk van die wêreld, na die koninkryk van God. Dit sluit nie net God se ingrype in nie, maar ook dat ons probeer om saam met God deel te neem en saam met God te werk. Ons aksies help ons om saam te werk en om die koninkryk van God uit te leef. Die bede is ons smeking dat God se koninkryk aan ons geopenbaar sal word en dat ons dit sal uitleef, sodat die hele wêreld sal transformeer en die koninkryk van God sal uitleef.
Ds Natasha Smit, Nelspruit/Barberton
