Psalm 19
Psalm 19 is deel van die Skeppingspsalms, dit is Psalms waarin vertel word hoe die hele skepping getuig van God se teenwoordigheid en standhoudende, voortdurende versorging vir alles wat leef en bestaan. Die natuur, sê die digter, het taal om van God se liefde te vertel. Wanneer ons luister, sal ons dit hoor. Dit het my laat dink aan die lied wat Christa Steyn geskryf het en wat Anneli van Rooyen sing: Luister na die wind.
As jy alleen deur bosse stap, en die eensaamheid in jou hand kan vat, as die son die stiltes stiller bak, luister na die wind. Soos klipkop en soos doringbos. Die eenlingskap ken jy mos, want daar’s dinge wat die wind vertel, wat mense nooit kan sê.
Luister na die wind wat waai en skuur deur buffelgras. Luister na sy fluister-praat, soos riet silinder blaar, na kantates tussen blare van die bos en kremetart. En sifreën wat ons toevou in die nag.
As ek alleen deur ruigtes stap, en die besies in die soetgras roep … luister na die wind.
Daar’s dinge wat die wind vertel wat mense nooit kan sê, die woorde wat in stiltes … kom lê. Die wind vertel ons stories van oranje kampvuurlig, luister, luister na die wind, luister na die wind…
Dit gaan oor ’n luister wat gegrond is in jou liefde vir God. Dit vertel van luister na God se woord, God se wil, omdat dit vir jou goed is, soeter as heuning, sê die digter. God se woord gee lewe, leer ons om God te vertrou, om ons harte vir die Here oop te maak en saam met die digter te bid: Mag wat ek sê en wat ek dink tog vir U aanneemlik wees, Here, my Rots en my Verlosser.
Dr Annelie Botha, Universiteit van Pretoria / Kempten
