Psalm 16
Om God se teenwoordigheid ten spyte van hierdie onstuimige wêreld te ervaar, was nog altyd vir die gelowige ’n belangrike saak. Tog soek ons dikwels God se teenwoordigheid slegs in groot gebeurtenisse of wonderwerke met asemrowende getuienisse, of selfs net tussen die vier mure van ’n kerkgebou. Dit, terwyl heilige oomblikke in God se teenwoordigheid oral, altyd en in enige omstandighede kan plaasvind en oorvloedige blydskap kan bring.
Sodra jou gebroke wêreld met God se genade en liefde in aanraking kom, is die gevolg daarvan altyd ’n heilige oomblik. Wanneer God se verhewe hoop, bystand en beskerming jou aardse swaarkry omhels, is die oomblik beslis heilig. Heilige oomblikke lê dus ook in die kleinste, alledaagse dinge wat ons so dikwels as vanselfsprekend ervaar of in die skepping rondom ons miskyk. Om jou oë in die oggend na ’n goeie nagrus te kan oopmaak, is ’n heilige oomblik. Om die glimlag op jou geliefdes se gesigte te aanskou, jou dagtaak te kan verrig en brood te hê om te eet, is alles heilige oomblikke. Psalm 16 getuig juis van die gevolge wanneer God se heiligheid en die mens se broosheid mekaar ontmoet. Die digter kom tot die besef dat elke oomblik in God se teenwoordigheid goed is en dat alles wat hy uit die Here se hand ontvang, vir hom mooi en kosbaar is.
Selfs in die donker van die nag is daar heilige oomblikke wanneer die digter bewus bly van God se volgehoue leiding en ontferming. Die feit dat hy in die dag van sy lewe van God se sorg kan getuig, maar ook in die nag die warmte van God se nabyheid kan aanvoel, bring die digter by ’n kragtige gevolgtrekking. Hy sê in vers 11: U leer my hoe om te lewe. By U is daar oorvloedige blydskap. Uit u hand kom net wat mooi is.
Mag jou dag vol heilige oomblikke saam met jou Skepper wees. Soek daardie heilige oomblikke selfs in die nag, want dit is oral, altyd!
Ds Marius Kramer, Krugersdorp-Oos
