Jesaja 35: 1-4
Ons almal beleef soms tye van ontmoediging in die lewe. Dit kan deur verskeie omstandighede veroorsaak word en gebeur maklik hier in Suid-Afrika. Dit bring ’n klomp onsekerheid na vore, ons word ontnugter en dit voel of ons beste pogings nie die moeite werd is nie. ’n Mens kan maklik ontmoedig raak en sukkel om gemotiveerd en hoopvol te bly.
In Jesaja 35 kondig die profeet ’n blye tyd van redding en herstel na die volk se swaarkry en ellende aan. Hy herinner hulle op ’n besondere wyse dat daar waar God in beheer is en hul volle geloof en vertroue in Hom geplaas word, die landskap van hul lewe en omstandighede weer sal verander. Danksy God se kragtige ingrype en volgehoue sorg en betrokkenheid by sy volk, kom daar altyd weer uitkoms vir dié wie se skouers hang en wie se knieë knik. Daarom sê die profeet vir hulle: Hou moed, jul God is hier!
In Hom en deur Hom verander ’n woestyn in ’n blommetuin, skep die moedeloses weer moed en word gebreke opgehef. God word altyd vir die ontmoedige mens ’n kragtige Bron van inspirasie, redding en uitkoms. Hy vra egter ’n lewende verhouding waarin die mens met opregte vertroue en doelgerigte gehoorsaamheid uit Hom as die Bron van lewende water sal put. Sonder hierdie standhoudende Bron kan ’n mens vinnig deur die lewe ontmoedig word.
Ons as gelowiges kan ook getuig: Ons God is hier! Jesus Christus se kruisdood en opstanding is die waarborg dat Hy as Immanuel in alle omstandighede by ons is. Dit beteken nie die afwesigheid van hartseer, swaarkry en moeilike uitdagings nie, maar is wel die waarborg dat niks ons van sy reddende liefde kan skei of ons uit sy genesende hand kan ruk nie. Deur sy inwonende Gees versterk Hy ons as ons swak is, tel Hy ons op as ons moeg is.
Hang jou skouers dalk vandag? Voel dit of jou knieë knak onder al die druk en uitdagings wat jy ervaar? Het die blommetuin van jou geestelike lewe in ’n dorre woestyn verander, omdat die lewe jou al te veel kere ontmoedig het? Hou moed! Wees sterk, moenie bang wees nie, want julle God is hier. Strome water sal uit jou woestyn bars!
Ds Marius Kramer, Krugersdorp-Oos
