Hosea 11: 1-11
’n Bekende Ou Testamentikus beskryf Israel hier as verslaaf aan die sonde. Dit kom oor ’n lang tyd van ontrou wees aan die Here. In Hosea 11 vind daar ’n gesprek tussen God as Vader en Israel as aangenome kind plaas. God het hulle uitgekies en geduldig oor jare met hulle gewerk. Hosea beskryf God se liefde en geduld vir sy kind. Maar telkens word God se toenadering en sorg beantwoord met diegene wat hul rug op God draai en ander gode gaan dien.
Dan kom die ernstigste klag teen hulle: Hulle weier om hulle te bekeer en terug te gaan na hul Vader toe. Hulle kies elke keer hierdie ontroue lewenstyl en hulle weier eenvoudig om God te eer. En dan kom die verrassende en onverstaanbare wending: In verse 8 tot 11 is daar skielik ’n ander stemtoon – een van liefde en sorg. In hierdie gedeelte sien ons die wonderlike, onverstaanbare genade van God. Genade wat heeltemal niks te doene het met iets wat Israel of ons kan verdien nie.
Jesus Christus is God se onverstaanbare genade en ons tweede kans. Jesus Christus is God se liefde wat nooit opgee en finaal vernietig nie. Hy neem dit op Hom om sy sondaarkind weer op te tel. En ons kan weet dat God nou nog so is. Dat sy genade groter is as wat ons verwag; vir onsself, maar ook vir ander mense. Dat Hy nie mense straf om hulle te vernietig nie, maar dat Hy sy mense op sy inisiatief na Hom terugbring. So ’n God kan ons mos dien en loof.
Hoeveel onverdiende genade het ek en jy nie al in ons lewe ontvang nie? Hoeveel keer het ek en jy nie al nog ’n kans gekry wat ons nie verdien nie? Hoeveel keer moes ek en jy nie al bely het nie dat God die moeilike oomblikke in ons lewens gebruik om ons nader aan Hom te bring? Ons lewens is vol onverdiende genade en tweede kanse! Gaan leef dankbaar en vol blydskap!
Ds Heloïse Herbst, Rietvallei
