Lukas 2: 1-7
Wanneer die aankondiging kom van ’n swangerskap, is daar uitbundige vreugde. Dit is met oorstelpte harte dat die toekomstige ouers hierdie nuus oral wil versprei. Ouma maak gereed om hierdie kind te verwelkom met gebreide klere of dalk gordyne vir die kamer. Oupa sien in sy geestesoog hoe daar saam stories vertel gaan word. Almal is opgewonde en dit voel dikwels dat nege maande te kort is om voor te berei. En dan breek die oomblik aan. Feestelikheid en liefde is op almal se gesigte. Die kind is hier! Gesond, ’n wonderlike geskenk.
Daar was egter min of eerder negatiewe opgewondenheid oor die Kind Jesus se geboorte by sy volksgenote en koning Herodes. Die opgewondenheid vind ons wel by die sterrekykers, vreemdelinge van die Jode. By die skaapwagters, mense van die laagste sosiale stand.
Hoe opgewonde is jy oor Christus se geboorte? Die ware betekenis van Kersfees raak dikwels in die spoed van die seisoen verlore: die inkopies, die partytjies, die gebak en die gesoek na geskenke. Die essensie van die seisoen is die grootste geskenk van alle tye – God het Jesus Christus, sy eie Seun, vir ons gegee.
Christus se geboorte bring nie net die opgewondenheid van ’n kind wat gebore is nie, dit bring baie meer. Ons behoort opgewonde te wees oor die verlossing wat aangebreek het. Vir die genade en liefde wat God aan ons openbaar. Hoop vir my en vir jou is gebore!
Die geboorte van Jesus bring groot vreugde vir almal wat Hom ontvang. Die doel van Kersfees is om hierdie vreugde te deel, sodat die hele wêreld die Verlosser sal ken.
Ds Lammert van Rooyen, Lichtenburg-Oos
