Psalm 8: 1-10
As ons na die skepping kyk, kan ons nie anders nie as om verbaas te wees oor die grootsheid en majesteit van God. Psalm 8 begin met ’n lofsang aan God: Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! (vers 2). Dit is ’n lofsang met ’n boodskap wat nie net in die tyd van die Psalmdigter geldig was nie, maar wat vandag nog net so geldig is. Ons leef in ’n wêreld waarin die impak van die mens op die skepping dikwels skrikwekkend is. Klimaatsverandering, uitputting van natuurlike hulpbronne, en afvalvermorsing, is net ’n paar voorbeelde van die skade wat die skepping aangebring word.
Die boodskap van Psalm 8 is ’n boodskap van hoop, met ’n uitnodiging. Die Psalm gaan van die grootsheid van God oor na die waarde van die mens. Dit sê: …wat is die mens dan dat U aan hom dink, die mensekind dat U na hom omsien? (vers 5). Hierdie vers dui aan dat God omgee vir elke mens, selfs al is ons so klein en onbeduidend in vergelyking met die grootsheid van die skepping. Dit is ’n uitnodiging om ons te verwonder oor die grootsheid van God en sy skepping, om ons te herinner aan die waarde wat God aan elke mens gee en die verantwoordelikheid van heerskappy oor sy skepping.
Die Psalm sê: U het hom net ’n bietjie minder as ’n hemelse wese gemaak en hom met aansien en eer gekroon, U laat hom heers oor die werk van u hande, U het alles aan hom onderwerp… (verse 6-7). Psalm 8 herinner ons daaraan dat ons nie net geskape is deur God nie, maar dat ons vir Hom waardevol is. Ons moenie ons waarde vind in sukses en prestasie of wat ons doen of bereik nie, maar in wie ons is. As mense wat vir God waardevol is, al is ons klein, het ons die verantwoordelikheid om sy skepping te bewaar en te bestuur, en elke dag met ’n lofsang en dankbaarheid te leef volgens die waarde wat God aan ons gee.
Dr Rudy Denton, Potchefstroom-Studente
